ऊर्जा खबर
काठमाडौँ । नेपाल विद्युत् प्राधिकरणले ८०० मेगावाट सौर्य विद्युत् उत्पादनका लागि आह्वान गरेको बोलपत्रका लागि आवेदन दिने म्याद ३ साता (२१ दिन) थप गरेको छ । यसका लागि प्राधिकरणले दाेस्रो पटक थपेको १ महिनाको म्याद असार ४ गते सकिन लागेपछि बुधबार सूचना प्रकाशित गरी तेस्रो पटक म्याद थप गरेको हो । यस अनुसार अब असार २५ गते दिनको २ बजेसम्म बोलपत्र आवेदन दिन सकिने छ ।
प्राधिकरणले सुरुमा २०८०, चैत २१ गते ४५ दिनको समय तोकेर देशभरका आफ्ना नजिकका सबस्टेसनमा जोड्न मिल्ने गरी ८०० मेगावाट सौर्य विद्युत् उत्पादन गर्न इच्छुक विकासकर्ताबाट प्रस्ताव मागेको थियो । अहिलेसम्म के कतिले आवेदन पर्यो भन्ने विषय प्राधिकरणले नखुलाएको भए पनि खुलाएको यसमा विकासकर्ताको सहभागिता न्यून देखिएको बुझिएको छ । कम विद्युत् खरिद सम्झौता (पिपिए) दर, जग्गा प्राप्ति जस्ता मुख्य समस्याले आवेदन दिन नसकेको विकासकर्ताहरूको भनाइ छ ।
प्राधिकरणले ऊर्जा मिश्रणको अवधारणा अनुसार राष्ट्रिय प्रणालीमा सौर्य ऊर्जाको हिस्सा बढाउन तथा हिउँदमा हुने ऊर्जा संकट तत्काल समाधान गर्न सौर्य विद्युत् आयोजना विकास गर्न खोजेको हो । यद्यपि, मुख्यतया जग्गाकै अभावले प्राधिकरणको यो प्रयास कठिन बनिरहेको देखिएको छ ।
यो पनि आवश्यक जग्गा उपलब्धताको संकटले विकासकर्तामा आकर्षण बढेन
.jpg)
