विद्युत् क्षेत्रमा जेन-जेड आन्दोलनको असरबारे प्राधिकरण भन्छ– विद्युत् संरचनामा ठूलो क्षति केही छैन

काठमाडौँ । नेपाल विद्युत् प्राधिकरणले विद्युत् संरचनामा खासै ठुलो क्षति नपुगेको जनाएको छ । जेन–जेडको प्रदर्शनपछि मंगलबार भड्किएको तोडफोड र आगजनीसहितको हिंसात्मक घटनामा विद्युत्‌का संरचनाहरूमा ठूलो क्षति नपुगेको जानकारी दिएको हो ।

‘विद्युत्‌का वितरण फिडहरूमा केही ठाउँमा सामान्य क्षति पुगेको पाइएको छ,’ प्राधिकरणका प्रवक्ता राजन ढकालले ऊर्जा खबरसँग भने, ‘क्षति पुगेका फिडरलाई मर्मत गरी सञ्चालनमा ल्याइएको छ भने केही ठाउँमा मर्मतको काम चलिरहेको छ ।’

देशकै ठूला र मूख्य प्रशासनिक भवन रहेको सिंहदरबार परिसर क्षेत्रमा पनि विद्युत् सुचारु गर्न एउटा फिडर तत्काल चालु गर्न सकिने अवस्था रहेकोले समस्या नरहेको उनले बताए ।