ऊर्जा खबर
काठमाडौं । निर्माण सम्पन्न भई सञ्चालनमा आएकाे १३२ केभी समुन्द्रटार–त्रिशूली डबल सर्किट प्रसारण लाइनकाे औपचारिक उद्घाटन शनिबार हुने भएकाे छ । प्रधानमन्त्री केपी शर्मा ओलीले भर्चुअल माध्यबाट प्रसारण लाइन सञ्चालनकाे उद्घाटन गर्न लागेका हुन् ।
शनिबार बिहान ११ बजे प्रसारण लाइन उद्घाटन गर्ने समय तय भएकाे आयोजना प्रमुख थर्कबहादुर थापाले बताए । नेपाल विद्युत प्राधिकरणले निर्माण सुरु भएकाे ५ वर्षमा सम्पन्न गरेकाे २६ किलाेमिटर लामाे याे प्रसारण लाइन गत असार १० गते नै सञ्चालनमा आइसकेकाे छ ।
समुन्द्रटारदेखि त्रिशूली ३ ‘बी’ हब सबस्टेसनसम्म आइपुग्ने प्रसारण लाइन र समुन्द्रटार सबस्टेसनमा लोड दिएर चार्ज गरिएको छ । प्राधिकरणले लक्ष्यभन्दा १ वर्ष ढिला गरी प्रसारण लाइन सञ्चालनमा ल्याएकाे हाे । सबस्टेसन ४ महिना अघि नै तयार भए पनि प्रसारण लाइनकाे निर्माण पूरा भएपछि मात्रै सञ्चालनमा ल्याइएको हो ।
काेराेना (काेभिड–१९) महामारीकाे पहिलाे र दाेस्राे लहरकाे प्रभाव प्रसारण लाइन निर्माणमा परेकाले लक्ष्यभन्दा ढिलाे गरी प्रसारण लाइन सञ्चालनमा ल्याइएकाे प्राधिकरणले जनाएकाे छ । काेराेनाकाे दाेस्राे लहरमा कामदार तथा कर्मचारी नै संक्रमित हुँदा समेत निर्माण नराेकी सम्पन्न गरिएकाले सञ्चालनमा ल्याउन सकिएकाे हाे ।
प्रसारण लाइन सञ्चालनमा आएपछि २७० मेगावाट विद्युत प्रवाह गर्ने संरचना तयार भएको छ । यो प्रसारण लाइनमा जोडिने गरी निजी लगानीमा अहिले ३५.३ मेगावाटका ७ जलविद्युत आयोजना निर्माणाधीन छन् ।
यो प्रसारण लाइन २०७७ बैशाखदेखि नै सञ्चालनमा ल्याउने गरी काम भइरहेको थियो । यसबीचमा कोरोना (कोभिड–१९) महामारीका कारण लगाइएको लकडाउनले लामो समय निर्माण रोकिँदा १ वर्ष धकेलिन पुगेको प्राधिकरणले जनाएको छ ।
प्रसारण लाइन निर्माणका क्रममा स्थानीय अवरोधका कारण पनि केही समय काम प्रभावित हुन पुगेको थियो । स्थानीय समस्या समाधान गरेर निर्माण सुचारु गरिएको थियो ।
प्राधिकरणले त्रिशूली, रसुवा र नुवाकोटमा निर्माणाधीन जलविद्युत आयोजनाको विद्युत प्रवाह गर्न यो प्रसारण लाइन निर्माण गरको हो । चीनको इटिइआरएन सिसिसिई एफइपिइसी जेभीले प्रसारण लाइन निर्माण गरेको हो । प्रसारण लाइन पूरा गर्न १ अर्ब ५१ करोड रुपैयाँ खर्च भएको छ ।
