भृकुटी मण्डपमा ४ वर्षपछि 'नाडा अटो शो'को रौनक फर्किँदै, आकर्षणमा विद्युतीय सवारी

काठमाडौं । नाडा अटोमोबाइल्स एसोसिएसन अफ नेपालले मंगलबार (२६ देखि ३१ भदौ) देखि ‘नाडा अटो शो २०२३’ आयोजना गर्दै छ । अर्थमन्त्री प्रकाशशरण महतले प्रदर्शनीको एक समारोहका बीच भृकुटीमण्डपमा साढे १२ बजे उद्घाटन गर्ने कार्यक्रम रहेको छ ।  २०७६ को अन्त्यबाट फैलिएको कोभिड-१९ महामारीका कारण झण्डै या ४ वर्षसम्म अघि बढ्न नसकेको उक्त प्रदर्शनी मंगलबारदेखि सुरु हुन लागेको हो ।

आयोजक नाडाका उपाध्यक्ष एवं मेला व्यवस्थापन संयोजक अनुप बरालका अनुसार यस पटकको मेलामा सानाठूला गरी विभिन्न सवारी साधन उत्पादक कम्पनी, आयातकर्ता तथा अन्य क्षेत्रका गरी कूल १२० वटा स्टल र ब्लकहरू रहनेछन् । दुई लाखभन्दा बढी अवलोकनकर्ताले उक्त मेलाको भ्रमण गर्ने अपेक्षा गरिएको उनले बताए । यो वर्षको मेला ४ वर्षपछि मात्रै लाग्न लागेको हुनाले अवलोकर्ताहरूको भीड हुने अपेक्षा रहेकाे आयोजकले जनाएको छ ।

संयोजक बरालका अनुसार प्रदर्शनीमा दुई पाङ्ग्रे तथा चार पाङ्ग्रे लगायतका सवारी साधन तथा लुब्रिकेन्ट र पार्टपूर्जाको प्रदर्शनी हुने छ । त्यस्तै, यो पटकको अटो शोमा विद्युतीय सवारी साधनलाई विशेष प्राथमिकताका साथ प्रदर्शनीमा राख्न लागिएको छ । पछिल्लो समय सवारी उत्पादक हरेक जसो कम्पनीले विद्युतीय सवारी समेत उत्पादन गर्न थालिसकेका छन् ।

अटो शोको अवलोकनका लागि २०० रुपैयाँको टिकट लाग्ने व्यवस्था गरिएको छ । यसमा विद्यार्थीले २५ प्रतिशत छुट पाउने छन् । मेलाको टिकट लिन भौतिक रूपमा मेलामै र डिजिटल माध्यमबाट खल्ती एपको प्रयोग गरेर लिन सकिने छ ।