विद्युत् प्राधिकरणद्वारा कर्मचारीलाई दिइने तालिमको 'आवश्यकता पहिचान' सुरु

काठमाडौँ । नेपाल विद्युत् प्राधिकरण अन्तर्गतकाे तालिम व्यवस्थापन विभागले प्राधिकरणद्वारा सञ्चालन हुने तालिमलाई मागमा आधारित, व्यवस्थित र वैज्ञानिक बनाउने उद्देश्यले तालिम आवश्यकता पहिचान गर्ने कार्यको थालनी गरेको छ । तालिमको आवश्यकता पहिचान गर्न पहिलो चरणमा अनलाइन सर्वेक्षण गर्ने र दोस्रो चरणमा विज्ञ सम्मिलित गोष्ठी सञ्चालन गर्ने तयारीसमेत गरेकाे जनाएको छ । 

प्राधिकरणको कार्यकारी निर्देशकमा हितेन्द्रदेव शाक्य आएपछि  तालिमलाई थप व्यवस्थित बनाउन नीतिगत निर्देशन भएबमोजिम विभागले तालिमलाई व्यवस्थित र नतिजामुखी बनाउन नवीन प्रयास प्रयास सुरू गर्ने क्रममा तालिम आवश्यकता पहिचान सुरु गर्न लागेको विभागले जनाएकाे छ । 

विभागका अनुसार चालु आर्थिक वर्षको जेठसम्म प्राधिकरणले कुल ७१ तालिम सञ्चालन गरिसकेको छ । जसबाट २०५० कर्मचारीले विभिन्न किसिमका तालिम लिइसकेका छन् । 

तालिम व्यवस्थापन विभागले पहिलो पटक कर्मचारीहरूको ३० कार्यदिनको सेवाकालीन तालिम समेत सुरू गरिसकेको जनाएको छ । आगामी दिनमा तालिम व्यवस्थापन विभागलाई उत्कृष्टताको केन्द्र बनाउने गरी योजना बनिरहेका र केही योजनाहरूको कार्यान्वयन समेत हुन थालेको तालिम व्यवस्थापन विभागका प्रशासन प्रमुख भरत केसीले जानकारी दिएका छन् ।