ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्री दीपक खड्काले नेपालको ऊर्जा विकास तथा सिँचाइको क्षेत्रमा जर्मन सरकारसँग थप सहकार्य गर्ने विषयमा छलफल गरेका छन् । बिहीबार मन्त्रालयमा नेपालका लागि जर्मनीका कार्यवाहक राजदूत बेन्जामिन साइडले गरेको शिष्टाचार भेटका क्रममा मन्त्री खड्काले आगामी दिनमा दुई देशबीचको थप सहकार्यका विषयमा छलफल गरेका हुन् ।
भेटमा जर्मनीले नेपाललाई गर्दै आएको सहयोगलाई कसरी थप प्रभावकारी बनाएर अगाडि बढ्ने भन्नेबारे छलफल भएको ऊर्जा मन्त्रीको सचिवालयले जनाएको छ । मन्त्री खड्काले यसअघि जर्मन सरकारले नेपालको जलविद्युत्, वैकल्पिक तथा नवीकरणीय ऊर्जाका क्षेत्रमा गरेको सहयोगप्रति धन्यवाद समेत ज्ञापन गरे ।
उनले नेपालले सन् २०३५ सम्म २८ हजार ५०० मेगावाट विद्युत् उत्पादन गर्ने लक्ष्य लिएको बताउँदै उक्त लक्ष्य प्राप्तिका लागि नेपालको जलविद्युत् आयोजनामा लगानी गर्न जर्मन सरकारलाई आग्रह गरे ।
भेटमा कार्यवाहक राजदूत साइडेलले नेपालको ऊर्जा क्षेत्रको विकासमा जर्मनीको निरन्तर साथ र सहयोग रहँदै आएको बताए । आगामी दिनमा पनि उक्त साथ र सहयोग निरन्तर रहने उनको भनाइ थियो ।
.jpg)
