ऊर्जा खबर
काठमाडौँ । नेपाल विद्युत् प्राधिकरणद्वारा निलम्बनमा परेका कर्मचारी (सहायक इन्जिनियर) दिनेश शिवाकोटीले न्याय नपाए आत्मदाह गर्ने चेतावनी दिएका छन् । गृहमन्त्री रवी लामिछानेलाई सम्बोधन गर्दै एक पत्र लेखेर उनले यस्तो चेतावनी दिएको सामाजिक सञ्जाल फेसबुकमार्फत सार्वजनिक गरेका छन् । आफ्नो जीवन रक्षाको माग गर्दै उनले ७ दिनभित्र सुशासनको प्रत्याभूति नभए प्राधिकरण परिसरभित्रै आत्मदाह गर्ने चेतावनी दिएका हुन् ।
पत्रको बोधार्थ उनले ऊर्जा मन्त्रालय र महालेखा नियन्त्रकको कार्यालयलाई समेत पठाएको उल्लेख गरेका छन् । उनले २४ फागुनमा राष्ट्रपतिलाई समेत पत्र लेखेर विभिन्न माग राखेको उल्लेख गरेका छन् । यद्यपी उनले राष्ट्रपतिलाई के लेखेका छन् भन्ने खुलाएका छैनन् ।
यसअघि नेविप्रा कर्मचारी सेवा, शर्त नियमावली २०७५ (संशाेधनसहित) विपरीतकाे गतिविधि गरेकाे भन्दै सहायक इन्जिनियर शिवाकोटीलाई प्राधिकरणले २३ फागुनदेखि लागु हुने गरी ६० दिनका लागि सेवाबाट निलम्बन गरेको थियो ।
