ऊर्जा खबर
काठमाडौं । एसियाली विकास बैंक (एडिबी) का पूर्वअध्यक्ष हारुहिको कुरोदाले प्रधानमन्त्री पुष्पकमल दाहालसँग भेटी नेपाल पर्याप्त जलविद्युत् उत्पादन गर्ने सम्भावना भएको मुलुक रहेको हुँदा कार्बन उत्सर्जनबाट लाभ लिन सक्ने बताएका छन् । पाँच दिने नेपाल भ्रमणमा रहेका कुरोदाले प्रधानमन्त्रीलाई भेटी यस्तो बताएका हुन् ।
जापानको केन्द्रीय बैंकका गभर्नर समेत रहिसकेका कुरोदाले पर्यावरण जोगाउन नेपालले खेलेको भूमिका प्रशंसनीय रहेकोले यसमा सघाउन जापान तयार रहेको बताए । सो अवसरमा प्रधानमन्त्री दाहालले वित्तीय सुधारका लागि वर्तमान सरकार क्रियाशील रहेको भन्दै जापान–नेपालको पुरानो सम्बन्ध नेपाल र नेपालीको समृद्धिका लागि थप उपयोग गर्नुपर्ने खाँचो औंल्याए ।
नेपालको आर्थिक क्षेत्रको विकासका लागि कुरोदाले लिएको सक्रियताप्रति प्रधानमन्त्री दाहालले प्रसन्नता व्यक्त गर्दै आर्थिक विकासको क्षेत्रमा जापानले मारेको फड्को पनि प्रेरक भएको बताए ।
यसैगरी, कुरोदाले अर्थमन्त्री डा. प्रकाशशरण महत, राष्ट्र बैंकका गभर्नर महाप्रसाद अधिकारी, अर्थ सचिव कृष्णहरि पुष्कर, पूर्व अर्थमन्त्रीहरू, अर्थविद्, वाणिज्य बैंकका कार्यकारी अधिकृतहरूसँग नेपालको आर्थिक विकासका विभिन्न पक्षबारे छलफल गरे ।
कुरोदा खबर हब र आईएसएस आरले काठमाडौं र पोखरामा आयोजित अर्थतन्त्रका विभिन्न आयामबारे गरिएका अन्तरक्रियामा सहभागी भई स्वदेश फर्किएका छन् ।
.jpg)
