बाढीले लघु जलविद्युत् आयोजनाको विद्युत्‌गृह बगायो, १३० घरमा बिजुली आपूर्ति बन्द

बलेवा । बाग्लुङको जैमिनी नगरपालिका–९ पैयुथन्थापस्थित कालुङ्खोले उपल्लो कालुङ्खोला लघुजलविद्युत् आयोजनाको बाँध र पावरहाउस बगाएको छ । बुधबार बिहान आएको बाढीले आयोजनाको बाँधसँगै विद्युत्‌गृह बगाएको स्थानीय गङ्गा आचार्यले बताए ।

उनका अनुसार गत वर्ष ३५ लाख रुपैयाँ लागतमा निर्माण गरिएको स्टिल पुलसमेत बगाएको छ । बाढीले केन्द्रीय विद्युत् प्रसारण लाइनको ट्रान्सफर्मरमा पनि क्षति पुगेको छ । ट्रान्सफर्मरमा क्षति भएपछि स्थानीय पैन्युथन्थापका १३० घरमा बिजुली आपूर्ति बन्द भएको छ ।

पैन्युथन्थापको खरेयाबोटका २ परिवार बाढीबाट विस्थापित भएका छन् । ७ परिवार बाढीपहिरोको जोखिममा रहेका छन् । बाढीबाट खोला किनारमा लगाइएको धानबालीमा समेत क्षति भएको छ ।