ऊर्जा खबर
काठमाडाैं । संखुवासभामा ६.३ मेगावाटको सभाखोला ‘सी’ जलविद्युत आयोजना निर्माण हुने भएको छ । अर्बिट इनर्जी प्रालिले सभापोखरी गाउँपालिका भएर बग्ने सभाखोलाको पानीलाई उपयोग गरी आयोजना निर्माण गर्न लागेको हो ।
प्रस्तावित आयोजनाको सम्भाव्यता र प्रारम्भिक वातावरणीय प्रभाव मूल्यांकन प्रतिवेदन तयार भइसकेको छ ।आयोजनाको मुख्य संरचनाहरू सभाखोलाको दायाँ किनारमा हेडपोण्ड तथा बायाँ किनारमा अन्य संरचना निर्माण हुनेछन् । आयोजनाकाे ११०२ मिटरको हेडरेस टनेल, ४७३ मिटर पेनस्टक पाइप निर्माण गरिने प्रतिवेदनमा उल्लेख छ ।
कम्पनीले अध्ययन सकिएकाे आयोजना अघि बढाउन उत्पादन अनुमतिका लागि विद्युत विकास विभागमा आवेदन दिएको छ । विभागले कम्पनीकाे नाममा अनुमति दिने प्रक्रिया अन्तिम चरणमा पुर्याएको छ । विभागले सार्वजनिक सूचना प्रकाशन गर्दै आयोजना निर्माण र सञ्चालन गर्दा कुनै प्रतिकूल असर पर्ने भए ३५ दिनभित्र लिखित राय/सुझाव पेस गर्न सरोकारवाला निकायहरूलाई अनुरोध गरेको छ ।
आयोजनाकाे सबै काम पूरा गरेर २ वर्ष अर्थात सन् २०२५ अगष्टभित्र उत्पादन गर्ने कम्पनीकाे लक्ष्य छ ।उत्पादित विद्युत १३२ केभी प्रसारण लाइनमार्फत २०.५० किलोमिटर दुरीमा रहेकाे नेपाल विद्युत प्राधिकरणकाे निर्माणाधीन सितलपाटी सबस्टेसनमा जाेडिनेछ ।
