ऊर्जा खबर
काठमाडौँ । राष्ट्रियसभाबाट ‘जलस्रोत विधेयक, २०८१’ राष्ट्रियसभाबाट सर्वसम्मत रूपमा पारित भएको छ । जलस्रोतको उपयोग, संरक्षण र व्यवस्थापनसम्बन्धी व्यवस्था गर्न ल्याइएको उक्त विधेयक शुक्रबार बसेको राष्ट्रिय सभाको बैठकले पारित गरेको हो ।
ऊर्जा, जलस्रोत तथा सिँचाइ मन्त्री दीपक खड्काले पेश गरेको ‘प्रतिनिधि सभाबाट सन्देशसहित आएको उक्त विधेयक पारित गरियोस्’ भन्ने प्रस्तावमाथि छलफल गरी सभाबाट उक्त विधेयक पारित गरिएको हो ।
दफावार छलफल गरी राष्ट्रियसभाको विधायन व्यवस्थापन समितिले २ दिनअघि मात्र उक्त विधेयक पारित गरेको थियो । विधायन समितिको प्रतिवेदनसहित उक्त विधेयकमाथि सभामा छलफल गरिएको थियो ।
सभामा छलफलका क्रममा सांसदहरूले उठाएको प्रश्नको जवाफ दिँदै मन्त्री खड्काले जलस्रोतको दीर्घकालीन र दिगो उपयोग तथा प्रभावकारी व्यवस्थापनलाई लक्ष्य गरी विधेयक ल्याइएको जानकारी दिए । उनले विधेयकमा बाँध तथा जलस्रोत संरचनाको सुरक्षासम्बन्धी प्रावधानलाई अझ स्पष्ट र कार्यान्वयनमैत्री बनाइएको बताएका थिए । जलस्राेतको उच्चतम सदुपयोग गर्दै समग्र विकासमा विधेयक सहयाेगी हुने बताए ।
