ऊर्जा खबर
काठमाडौं । नेपाल विद्युत प्राधिकरणले धनगढी उपमहानगरपालिकाको कार्यालय परिसरमा निर्माण गरेको विद्युतीय सवारी चार्जिङ स्टेसन सञ्चालनमा आएको छ । चार्जिङ स्टेसन आइतबारदेखि सञ्चालनमा आएको हो ।
आइतबार धनगढी उपमहानगरपालिकाका उप-प्रमुख कन्दकलाकुमारी रानाले चार्जिङ स्टेसनको उद्घाटन गरेकी छिन् । १४० किलोवाट क्षमताको चार्जर रहेको उक्त चार्जिङ स्टेसनमा छिटो चार्ज गर्न मिल्ने ६०–६० किलोवाटका डिसी र २२ किलोवाटका एसी चार्जर राखिएको छ ।
सवारी साधनको चार्ज गरिसकेपछि ग्राहकले क्यूआर कोड र मोबाइल एपमार्फत बिलको भुक्तानी गर्न सक्नेछन् । चार्जिङ स्टेसनमा पेट्रोलपम्पमा जस्तो मान्छे बसेर सेवा दिइरहनु नपर्ने प्राधिकरणले जनाएको छ । चार्जिङ स्टेसनमा पुगेर गाडी चार्ज गर्नुअघि सवारी धनीले कति मिनेटसम्म वा कति रुपैयाँको चार्ज गर्ने हो सोही अनुसारको कार्ड स्वाइप गरेर पैसा तिरेपछि त्यही अनुसार चार्ज हुने प्राधिकरणले जनाएको छ ।
बिहान र राति चार्ज गर्दा प्रतियुनिट १०.४४ रुपैयाँ, दिउँसो प्रतियुनिट ८.२८ रुपैयाँ र राति ११ बजेपछि चार्ज गर्दा प्रतियुनिट ६ रुपैयाँ चार्ज शुल्क तोकिएको छ ।
