मैले पदको दुरुपयोग गरी मेरा दाजुभाइलाई फाइदा पुग्ने कुनै काम गरेको छैन : कुलमान घिसिङ

काठमाडौँ । नेपाल विद्युत् प्राधिकरणका कार्यकारी निर्देशक कुलमान घिसिङले आफूले पदको दुरुपयोग गरी आफ्ना दाजु तथा भाइले सञ्चालन गरेकाे व्यवसायलाई फाइदा पुग्ने कुनै कार्य नगरेको बताएका छन् । बुधबार प्रेस विज्ञप्ति जारी गरी उनले आफूले गुणस्तरीय विद्युत् आपूर्तिका लागि आफ्नो पदीय जिम्मेवारी निष्ठाका साथ पूरा गरिरहेको दाबी गरेका हुन् ।

आफ्ना परिवारका सदस्यहरू (मुख्य रूपमा दाजु र भाइ) को प्रतिष्ठामा आघात पुर्‍याउने गरी समाचार तथा टीका–टिप्पणी आइरहेको भन्दै उनले विज्ञप्तिमा भनेका छन्– ‘यदि मैलै त्यस्तो गरेको पाइएमा राज्यका निकायहरूले छानबिन गर्ने नै छन् ।’ 

उनले आफ्ना दाजुभाइले कानुनले दिएको अधिकार प्रयोग गरी स्वतन्त्र रूपले व्यवसाय गर्दै आएको पनि बताएका छन् । 

विज्ञप्तिमा भनिएको छ– ‘अंशवण्डा गरी लामो समयदेखि मबाट छुट्टै बसिरहेका मेरा दाइ र भाइले नेपालको संविधान र ऐन कानुनले दिएको हकअधिकार प्रयोग गरी स्वतन्त्र रुपमा आफ्नो व्यापार व्यवसाय सञ्चालन गरिरहेका छन् । के मेरा दाइ र भाइले स्वदेशमै व्यापार व्यवसाय नगरी विदेशिनु पर्ने हो ?’ 

उनले नेपाल विद्युत् प्राधिकरणका हरेक कामकारबाहीहरु पारदर्शी रुपमा भइरहेको दाबी गर्दै उनले अझै पारदर्शी रूपमा अगाडि बढाउने उल्लेख छन् ।