ऊर्जा खबर
काठमाडौँ । एनएमबि बैंकले आफ्ना सेयरधनीलाई १० प्रतिशत लाभांश वितरण गर्ने भएको छ । आर्थिक वर्ष २०८१/८२ को मुनाफाबाट सेयरधनीहरूलाई हाल कायम चुक्ता पुँजीको ५ प्रतिशत बोनस सेयर र ५ प्रतिशत नगद लाभांश (कर प्रयोजनसहित) वितरण गर्ने प्रस्ताव बैंकको बिहीबार सम्पन्न ३०औँ वार्षिक साधारणसभाले पारित गरेको हो ।
बैंकले २०८२ असार मसान्तसम्ममा २ अर्ब ८५ करोड खुद नाफा आर्जन गर्नुका साथै २ खर्ब ८३ अर्ब ६५ करोड रुपैयाँ निक्षेप सङ्कलन र २ खर्ब ४३ अर्ब ३ करोड कर्जा प्रवाह गरेको वित्तीय विवरण सार्वजनिक गरेको छ ।
बैंक सञ्चालक समितिका अध्यक्ष मनोजकुमार गोयलको सभापतित्वमा बिहीबार आर्मी अफिसर्स क्लबमा भएको साधारसभामा सञ्चालक र सेयर धनीहरूको उपस्थिति थियो । साधारणसभामा सेयरधनीहरूले मन्तव्य राख्दै बैंकका विविध पक्षमाथि छलफल गरेका थिए ।
बैंकले हाल देशभरि २०२ शाखा, १८४ एटिएम र ९ एक्सटेन्सन काउन्टरहरू मार्फत बैंकिङ सेवा प्रदान गर्दै आइरहेको छ ।
