ऊर्जा खबर
काठमाडौं । कुलेखानी जलाशयमा आधारित जलविद्युत् आयोजनाहरूको नियन्त्रण तथा संरक्षण प्रणालीको विस्तार तथा सुदृढीकरणका लागि नेपाल विद्युत् प्राधिकरण र एन्ड्रिज हाइड्रो प्रालिबीच सम्झौता भएको छ ।
दुई नियकाबीच सोमबार भएको सम्झौता अनुसार एड्रिज हाइड्रोले कुलेखानी जलाशयमा आधारित ६० मेगावाटको कुलेखानी पहिलो र ३२ मेगावाटको कुलेखानी दोस्रो आयोजनाको नियन्त्रण र सुरक्षा प्रणाली सुधारमा काम गर्नुपर्ने छ ।
यसका लागि एन्ड्रिजले आयोजनाका लागि अत्याधुनिक ‘सुपरभाइजरी कन्ट्रोल एन्ड डेटा एक्युजिशन सिस्टम (एससिएडिए)’, व्यापक सुरक्षा प्रणालीहरु, कम्पनको निगरानी प्रणाली, आयोजनाका लागि आवश्यक स्पेयर्स पार्टस् र यससँग सम्बन्धित सबै सहायक सेवा उपलब्ध गराउने छ ।
सम्झौता अनुसार एन्ड्रिजले प्राधिकरणका इन्जिनियरहरुलाई आयोजना क्षेत्रमै गएर पनि तालिम तथा प्रशिक्षण दिने छ । उक्त सेवाहरु कम्पनीले आयोजनालाई नेपाल र भारतका दुवै स्थानबाट प्रदान गर्ने जनाएको छ ।
