ऊर्जा खबर
काठमाडौं । नेपाल विद्युत प्राधिकरणका उपकार्यकारी निर्देशक लेखनाथ कोइराला सेवाबाट अवकास भएका छन् । प्राधिकरणमा साढे ३२ वर्ष लामो कार्यकाल पूरा गरी मंगलबार (भदौ २२ गते) देखि उनले सेवाबाट अनिवार्य अवकास पाएका हुन् ।
२०४५ साल फागुनमा ६ तह (सहायक लेखा अधिकृत) बाट प्राधिकरणको सेवामा प्रवेश गरेका कोइराला अर्थ निर्देशनालयको उपकार्यकारी निर्देशक (१२ तह) को जिम्मेवारीमा पुगेपछि अनिवार्य अवकास पाएका हुन् । अर्थ निर्देशनालयको प्रमुख भई उनले ७ वर्ष सेवा गरेपछि यहीबाट अवकास भएका हुन् ।
प्राधिकरणमा रहँदा उनले केही समय निमित्त कार्यकारी निर्देशकको जिम्मेवारी पनि पाएका थिए । अहिलेका कार्यकारी निर्देशक कुलमान घिसिङ पहिलो कार्यकाल पूरा गरेर प्राधिकरणबाट बाहिरिएपछि कोइरालालाई निमित्त कार्यकारी निर्देशकको जिम्मेवारी दिइएको थियो ।
अवकासपछि स्वतन्त्ररूपमा चार्टड एकाउन्टेन (सिए) भएर काम गर्ने योजना रहेको कोइरालाले बताए । ‘प्राधिकरणमा लामो समय सेवा गरेर अवकास लिएकाले अब कुनै नयाँ ठाउँमा आवद्ध भएर काम गर्ने मेरो योजना छैन,’ उनले ऊर्जा खबरसँग भने, ‘स्वतन्त्ररूपमा आउने काम मात्रै गरेर बस्छु ।’
उनले ३ दशक बढी समय प्राधिकरणमा बिताएकाले अहिले छोड्दा दुखः लागे पनि आउने दिनका लागि खुसी लागेको बताए । प्राधिकरणले मंगलबार विशेष कार्यक्रमको आयोजना गरी कोइरालाको विदाई गरेको छ ।
