ऊर्जा खबर
काठमाडौं । बन्दीपुर गाउँपालिका–१ भैँसीगोठ खानेपानी योजनाको निर्माण पूरा भएको छ । गाउँपालिकाको आर्थिक सहयोग, स्थानीयवासीबाट सङ्कलित रकम र जनश्रम व्यहोरेर उक्त योजना सम्पन्न गरिएको हो ।
विगत लामो समयदेखि कुवाँको पानी बोकेर खाने गरेका उक्त बस्तीको घरघरमा पानीको धारा पुगेपछि स्थानीयबासी खुसी भएका छन् । १९ लाख ६५ हजार रुपैयाँको लागतमा उक्त योजना सम्पन्न भएको भैँसीगोठ खानेपानी तथा उपभोक्ता समितिका अध्यक्ष सुस्मा कार्की शाहीले बताए ।
योजनाका लागि बन्दीपुर गाउँपालिकाबाट ११ लाख ५० हजार रुपैयाँ, उपभोक्ताबाट सङ्कलित ४ लाख ८५ हजार रुपैयाँ र ३ लाख ३० हजार रुपैयाँ बराबरको जनश्रम व्यहोरिएको थियो ।
योजनाबाट ३४ वटा धारा निर्माण गरी खानेपानी वितरण गरिएपछि त्यसक्षेत्रका ५३ घरधुरी लाभान्वित भएका छन् । बस्तीदेखि कुवा टाढा रहेका कारण पानीका लागि एक जनशक्ति नै खटाउनुपर्ने बाध्यता हटेको उपभोक्ता समिति सदस्य लक्ष्मी थापाले बताए ।
वडास्थित खहरे खोल्सीको पानी लिफ्टिङ गरेर बस्तीमा पानी वितरण गरिएको हो । खोल्सीको पानी करिब ३०० मिटर उचाइमा लिफ्ट गरी ट्याङ्कीमा सङ्कलन गरेर वितरणको व्यवस्था मिलाइएको वडाध्यक्ष भानुभक्त पोख्रेलले बताए ।
.jpg)