ऊर्जा खबर
काठमाडौं । नेपाल विद्युत प्राधिकरणले सडक बत्तीकाे बाँकी महसुल छिटाे बुझाउन आग्रह गरेकाे छ । विद्युत महसुल बक्यौतामा ठुलो हिस्सा सडक बत्तीकाे रहेकोले बाँकी महसुल बुझाउन अनुराेध गरेकाे हाे ।
सडक बत्तीको मापन गरिएअनुसारकाे महसुल भुक्तानी नहुँदा ठुलो नोक्सान भएको भन्दै प्राधिकरणले महसुल तिर्न अनुराेध गरेकाे छ । स्थानीय निकायले प्राधिकरणको कुनै पनि सहमति बिना आफुखुसी गरी सडक बत्ती जडान गरिरहेकाेले अनुमति बिना जडान नगर्न पनि प्राधिकरणले अनुराेध गरेको छ ।
मापन गरिएको विद्युत खपतको समेत महसुल भुक्तानी नहुँदा प्राधिकरणले नोक्सानी व्यहोर्नुपरेको प्राधिकरणले जनाएकाे छ । प्राधिकरणले, प्राधिकरण अन्तर्गत वितरण केन्द्रको सहमति बिना विद्युत लाइनबाट सडक बत्ती जडान नगर्न आग्रह गरेको छ ।
सडक बत्तीका लागि सिङ्गल फेज इनर्जी मिटर प्राधिकरण आफैले निशुल्क उपलब्ध गराउनेछ । एउटा सिङ्गल फेज इनर्जीबाट १०० वाटको ५० वटाभन्दा बडी सडक बत्तीको विद्युत खपत मापन गर्न सकिने हुँदा प्रत्येक सडक बत्तीलाई छुट्टाछुट्टै इनर्जी मिटर उपलब्ध नगराउने पनि प्राधिकरणले जानकारी दिएको छ ।
यसैगरी, मिटरको क्षमता तथा सडक बत्ती जडान गरेको क्षेत्रको आधारमा सम्बन्धित वितरण केन्द्रसँग समन्वय गरी स्थानीय निकायले छुट्टै केबल तानी सडक बत्तीका लागि मिटर जडान गर्न पनि अनुरोध गरेको छ । तोकिएको समयमा सडक बत्तीमा मिटर जडान नगरेमा अथवा विद्युत महसुल बाँकी बक्यौता भुक्तानी नगरेमा प्रचलित नियमअनुसार कारबाही हुनेछ ।
