ऊर्जा खबर
काठमाडौं । इलाममा निर्माणाधीन ९.५१ मेगावाटको माइबेनी जलविद्युत आयोजनाले आगामी फागुनदेखि विद्युत उत्पादन सुरु गर्ने भएको छ । निर्माण अन्तिम चरणमा पुगेको आयोजनाले अबको डेढ महिनामा विद्युत उत्पादन गर्न लागेको हो ।
ऊर्जा डेभलपर्स प्रालिको सहायक सामलिङ्ग पावर कम्पनीले निर्माण गरेकाे आयोजनाकाे काम अहिलेसम्म ८० प्रतिशतभन्दा बढी सम्पन्न भएको छ । गरिरहेको छ । मुख्य संरचनाको काम सकिन लागेकाले लक्ष्यअनुसार नै विद्युत उत्पादन हुने आयोजनामा कार्यरत इन्जिनियर सिद्वान्त थपलियाले बताए ।
उनका अनुसार आयोजनाको बाँध, पाइपलाइन, सुरुङ, र विद्युतगृहमा एकसाथ काम भइरहेको छ । ‘बाँध क्षेत्रको निर्माण करिब ९० प्रतिशत पूरा भइसकेको छ’, उनले ऊर्जा खबरसँग भने, ‘बाँकी १० प्रतिशत काम पनि एक सातामा सकिँदैछ । त्यसपछि एक महिनामा सम्पन्न गर्ने गरी मेकानिकल उपकरण जडान सुरु हुन्छ ।’
उनले आयोजनाको करिब ३५० मिटर लामो पेनस्टक पाइपलाइन जडान कार्य ७० प्रतिशत पूरा भइसकेको बताए । १००० र १४०० मिटर लामो दुई वटा सुरुङमा ढलानको काम भइरहेको छ । यो काम अबको २ सातामा सम्पन्न भइसक्ने पनि उनले बताए । विद्युतगृहमा इलेक्ट्रो मेकानिल उपकरण जडानको काम अन्तिम चरणमा पुगेको छ । उकरण जडानको काम पूरा गर्न अब एक महिना लाग्ने कम्पनीको दाबी छ ।
आयोजना सम्पन्न भई उत्पादन हुने विद्युत काबेली कोरिडोरको १३२/३३ केभी गोदक सबस्टेसनमा जोडिनेछ । विद्युतगृहदेखि सबस्टेसनसम्म आवश्यक साढे २ किलोमिटर लामो प्रसारण लाइन कम्पनीले निर्माण गरिएको छ । आयोजना सम्पन्न गर्न २ अर्ब रुपैयाँ लागत अनुमान गरिएको छ । आयोजनामा एसबीआइ (अगुवाई) र सिद्वार्थ बैंकले कूल लागतको ७५ प्रतिशत ऋण लगानी गरेका छन् । बाँकी २५ प्रतिशत स्वपुँजी लगानी छ ।
कम्पनीले स्वपुँजी लगानी जुटाउन १२ करोड ३० लाख रुपैयाँ मूल्यको १२ लाख ३० हजार कित्ता साधारण सेयर निष्कासन गर्दैछ । सेयर निष्कासन गर्न एनआईबिएल एस क्यापिटल लिमिटेडलाई प्रत्याभूतिकर्ता नियुक्त गरिएको छ । आयोजना सञ्चालनमा आउँदा वार्षिक ५३.२८ गिगावाट घन्टा विद्युत उत्पादन हुनेछ ।
