खिम्ती–ढल्केबर २२० केभी प्रसारण लाइन अवरुद्ध, बिजुली निर्यात प्रभावित

काठमाडौँ । नेपाल विद्युत् प्राधिकरणको राष्ट्रिय विद्युत् प्रसारण प्रणालीअन्तर्गतको खिम्ती–ढल्केबर २२० केभी प्रसारण लाइन अवरुद्ध भएको छ । हावाहुरी सहितकाे वर्षा र चट्याङ्‌का कारण सोमबार साँझदेखि प्रसारण लाइन अवरुद्ध भएको प्राधिकरणले जनाएको छ । भारतसँगको विद्युत् व्यापारका लागि महत्वपूर्ण भूमिका निर्वाह गरिरहेको यो लाइन अवरुद्ध हुँदा हाल वर्षाको मौसममा नेपालबाट भारत निर्यात हुने बिजुली प्रभावित भएको छ ।

यो लाइनकै सहयोगमा भारत निर्यात् हुँदै आएको करिब ३०० मेगावाट विद्युत्को निर्यात प्रभावित भएको प्राधिकरणका प्रवक्ता चन्दन घोषले ऊर्जा खबरलाई बताए । हाल भारतमा ५६० मेगावाट हाराहारीमा विद्युत् निर्यात हुँदै आएको प्राधिकरणको विवरणमा उल्लेख छ । यो लाइनमार्फत खिम्ती क्षेत्रबाट काठमाडौँ आउने बिजुलीसमेत अवरुद्ध भएको उनको भनाइ छ । 

‘यस्ता प्राविधिक समस्या आउनु ठूलो कुरा होइन,’ उनले भने, ‘कहिलेकाही आउँछन्, वर्षा भइरहेकोले लाइन सञ्चालनमा ल्याउन कठिन भइरहेको हाे ।अहिले पनि लाइन सञ्चालनमा ल्याउन प्राविधिक टोलीले प्रयास गरिरहेको छ । अबको २/३ घण्टाभित्र सञ्चालनमा आउन सक्छ ।’