ऊर्जा खबर
नवलपरासी । पश्चिम नवलपरासीको सुस्ता गाउँपालिका–४ स्थित ३५० घरधुरी रहेको नारायणी पारि सुस्तामा विद्युत् प्रसारण लाइन विस्तार हुने भएको छ । १ हजार ५७१ मिटर लामो झोलुंगे पुलको प्रयोग गरी नारायणी पारिसम्म विद्युतीकरण गर्न लागिएको हो ।
संघीय सरकारको सौर्य मिनी ग्रिड परियोजनाको ४ करोड ८० लाख रुपैयाँ लागतमा उज्यालो सुस्ता अभियानको घोषणा गर्दै सुस्तामा सोलार प्रणाली जडान गरिएको थियो तर पटक–पटक बिग्रिने र सुस्तावासीलाई पर्याप्त विद्युत् नपुग्ने समस्या थियो । अहिले नारायणी नदीमा झोलुंगे पुल निर्माणसँगै विद्युतीकरण हुने भएपछि सुस्तावासी अँध्यारोमा बस्नुपर्ने बाध्यताबाट मुक्त हुने सुस्ता बचाउ अभियानका अभियन्ता रवीन्द्र पटेलले बताए ।
सोलार प्रणालीको जडानसँगै शुरू भएको उज्यालो अभियान विद्युतीकरणसहित पूरा हुने भएको हो । झोलुंगे पुलमा विद्युत् सुरक्षाको पूर्ण मापदण्ड पूरा गरी विद्युत् प्रसारण लाइन पुलको सहारामा पारी सुस्ता पुर्याउन लागिएको नेपाल प्राधिकरण बर्दघाट वितरण केन्द्रका प्रमुख प्रशान्त झाले जानकारी दिए । झाका अनुसार हालसम्म ६०० मिटर तार तानिएको छ भने यस्तो प्रकृतिको विद्युतीकरणको काम चुनौतीपूर्ण रहेकाे छ ।
वारि सुस्ता र पारि सुस्ता दुवैतर्फ विद्युतीकरणको पोल र तार राखिसकिएको र अब झोलुंगे पुलमा आउँदो महिनाभित्र राखिसक्ने विद्युतीकरणको ठेक्का पाएको एम डि राजा निर्माण सेवाले जनाएको छ । सो कार्यका लागि १ करोड ३० लाख रूपैयाँ लागत लाग्नेछ । सो रकम प्राधिकरणको स्रोतबाट खर्च गरिने झाले बताए ।
