ऊर्जा खबर
काठमाडौं । सिन्धुपाल्चोकमा बिहीबारबाट निशेधाज्ञा लागेपछि मध्यभोटेकोसी जलविद्युत कम्पनीले स्थानीयबासीले पाउने साधारण सेयर निष्कासन स्थगित गरेको छ । कोरोना (कोभिड–१९) महामारीको संक्रमण बढेको भन्दै जिल्ला प्रशासन कार्यालय निशेधाज्ञा लगाएकाले स्थानीय सेयर निष्कासन स्थगित गरिएको हो ।
कम्पनीले बिहीबार विज्ञप्ती निकाले निशेधाज्ञाका कारण स्थानीयबासीले सहजरूपमा सेयर खरिदको आवेदन दिन नसक्ने हुँदा बिक्री स्थगत गर्नु परेको जनाएको छ । कम्पनीका अनुसार स्थिती सहज नहुन्जेलसम्मका लागि स्थानीय सेयर निष्कासन बन्द हुनेछ ।
‘जिल्लामा निशेधाज्ञा लागेकाले अर्को व्यवस्था नहुन्जेल तल्कालका लागि सेयर निष्कासन कार्य स्थगत गर्नुपरेको छ,’ विज्ञप्तीमा भनिएको छ, ‘स्थिती सामान्य भएपछि अर्को सूचना निकालेर स्थानीयबासीका लागि छुट्याइएको सेयर बिक्री खुल्ला गरेको जानकारी गराउँछौं ।
कम्पनीले गत मंगलबार (बैशाख २१ गते) देखि निर्माणाधीन १०२ मेगावाटको मध्यभोटेकासी जलविद्युत आयोजना प्रभावित क्षेत्रका स्थानीयबासीका लागि प्रतिकित्ता सय रुपैयाँ अंकित ६० करोड रुपैयाँ मूल्यको ६० लाख कित्ता साधारण सेयर निष्कासन गरेको थियो ।
६० लाख कित्तामध्ये भोटेकोसी गाउँपालिकाको वडा नम्बर–१ र ५, बाह्रबिसे नगरपालिकाको वडा नम्बर–५, ६, ७ र ८ का स्थानीयबासीका लागि १८ लाख कित्ता र जिल्लाबासीका लागि ४२ लाख कित्ता सेयर छिटोमा जेठ ४ र जेठ २० गतेसम्म आवेदन दिन पाउने गरी निष्कासन गरिएको थियो ।
सेयर निष्कासन तथा बिक्री प्रबन्धकमा ग्लोबल आइएमई क्यापिटल रहेको छ । अन्य ६ कम्पनी सह–प्रबन्धक छन् । चिलिमेको सहायक मध्यभोटेकोसीले १०२ मेगावाटको आयोजना निर्माण गरिरहेको छ ।
.jpg)