विद्युत् विकास विभागको महानिर्देशकमा जिबछ मण्डल, ५ जना सहसचिवमा बढुवा

काठमाडौँ । विद्युत् विकास विभागको महानिर्देशकमा जिबछ मण्डल नियुक्त भएका छन् । ऊर्जा, जलस्रोत तथा सिँचाइ मन्त्रालयको मन्त्रीस्तरीय निर्णयबाट सोमबार (२२ माघमा) उनलाई उक्त जिम्मेवारी तोकिएको हो ।

यसअघि महानिर्देशक रहेका चिरञ्जीवी चटौतलाई मन्त्रालयमा सरुवा गरी विभागकै उपमहानिर्देशक मण्डललाई जिम्मेवारी तोकिएको हो । २०५३ साल मंसिरमा विभागको इन्जिनियरबाट सरकारी सेवा प्रवेश गरेका उनी २०७१ साल माघमा सहसचिवमा बढुवा भएका थिए । विभागको जिम्मेवारीमा प्रवेश गर्नुपूर्व मण्डलले १ वर्ष जनकपुर चुरोट कारखानामा इलेक्ट्रिकल सेक्सन इन्चार्ज र पश्चिमाञ्चल क्षेत्रीय क्याम्पस पोखरामा इलेक्ट्रिकल इन्जिनियरिङ विभाग अन्तर्गत उप–प्राध्यापक भएर जिम्मेवारी पूरा गरेका थिए ।

मण्डलले कोलम्बो प्लान अन्तर्गत अलिगड मुस्लिम विश्वविद्यालयबाट इलेक्ट्रिकल इन्जिनियरिङमा स्नातक र रुड्की विश्वविद्यालयबाट जलविद्युत् तथा व्यवस्थापनमा स्नातकोत्तर तहसम्मको अध्ययन पूरा गरेका छन् ।

यसैगरी, मन्त्रालयले सिडिई मीनराज ढकाल, बाबुराज अधिकारी, सागरराज गौतम, शंकरबहादुर थापा र राजेन्द्रप्रसाद शर्मालाई सहसचिवमा बढुवा तथा पदस्थापन गरेको छ।

अधिकारी मन्त्रालय, गौतम लगानी बोर्ड र अन्य ३ सिडिई जलस्रोत तथा सिँचाइ विभागमा कार्यरत थिए । बढुवापछि अधिकारीलाई लगानी बोर्ड, गौतमलाई विद्युत् नियमन आयोग तथा ढकाल, थापा र शर्मालाई क्रमशः प्राथमिकता प्राप्त आयोजना, कर्णाली बेसिन आयोजना र नौमुरे आयोजनाकाे प्रमुखको जिम्मेवारी तोकिएको छ ।