ऊर्जा खबर
काठमाडौं । रसुवागढी हाइड्रो पावर कम्पनीको प्रमुख कार्यकारी अधिकृतमा छवि गैरे नियुक्त भएका छन् । कम्पनीकाे गत शुक्रबार बसेको सञ्चालक समिति बैठकले गैरेलाई कम्पनीको उक्त पदमा नियुक्त गरिएको हो ।
गैरे यसअघि यही कम्पनीले प्रवर्द्धन गरेको रसुवामा निर्माणाधीन १११ मेगावाटको रसुवागढी जलविद्युत आयोजनाको प्रमुखकको जिम्मेवारीमा थिए । ५ वर्षसम्म आयोजनामा काम गरेपछि कम्पनीको नेतृत्व लिने जिम्मेवारी पाएको उनले बताए ।
‘म २०७३ सालको मध्यदेखि निमित्त आयोजना प्रमुख हुँदै आयोजना प्रमुखको जिम्मेवारीमा रही काम गरिरहेको थिए,’ उनले ऊर्जा खबरसँग भने, ‘अहिले कम्पनीको कार्यकारी प्रमुखको जिम्मेवारी पाएको छु । यो जिम्मेवारीको पूर्णरूपमा पालना गरेर आयोजना सम्पन्न गर्नमा मेरो भूमिका रहनेछ ।’
गैरेले रसुवागढीमा आउनुअघि निर्माण सम्पन्न भई सञ्चालनमा आइसकेको ६० मेगावाटको माथिल्लो त्रिशूली थ्री ‘ए’ जलविद्युत आयोजनामा काम गरेका थिए । लमजुङस्थित ७० मेगावाटको मध्यमर्स्याङ्दी जलविद्युत आयोजनामा काम गरेको अनुभव पनि उनीसँग छ ।
जलस्रोत विषयमा स्नातकोत्तर तहसम्मको अध्ययन गरेका उनी २०५८ सालमा ७ तह (करार) बाट विद्युत प्राधिकरणमा प्रवेश गरेका थिए । उनले २०६० सालमा प्राधिकरणमा स्थायी नियुक्ती पाएका थिए ।
गैरेलाई भूकम्प, नाकाबन्दी, बाढी, पहिरो हुँदै अहिले कोरोना (कोभिड–१९) महामारीको प्रभावले निर्माण गति सुस्त हुन पुगेको आयोजना चाँडै सम्पन्न गरी राष्ट्रिय प्रसारण प्रणालीमा जोड्नु पर्ने चुनौती छ ।
आयोजनाको मुख्य सिभिल संरचनाको निर्माण अन्तिम चरणमा पुगिसकेको छ । सिभिल संरचना र हाइड्रोमेकानिकल उपकरण जडानको काम आगामी चैतभित्र सम्पन्न गर्ने पछिल्लो तालिका छ । इलेक्ट्रोमेकानिकल उपकरणहरू सबै आयोजना स्थलमा आइपुगेका छन् । इलेक्ट्रोमेकानिकल उपकरण जडान कार्य पनि धमाधम भइरहेको छ ।
