ऊर्जा खबर
काठमाडौं । नेपाल विद्युत् प्राधिकरण, पोखरा वितरण केन्द्रले एकै दिनमा ११७ ग्राहकको विद्युत् लाइन काटेको छ । केन्द्रले ६० दिनभन्दा बढी बक्यौता महसुल भएको ग्राहकको लाइन काटेको हो ।
५४ लाख ४४ हजार ९५९ रुपैयाँ विद्युत महसुल नबुझाउने ११७ ग्राहकको लाइन काटेको केन्द्र प्रमुख राजिवकुमार सिंहले बताए । उनका अनुसार लाइन काटिएकामध्ये ४ सरकारी कार्यालय रहेका छन् । यी कार्यालयको मात्र २० लाख १४ हजार ५५० रुपैयाँ बाँकी छ। बाँकी ११३ ग्राहकको ३४ लाख ३० हजार ४०९ रुपैयाँ बाँकी छ ।
उनका अनुसार आइतबार मात्र १०० ग्राहकले जरीवानासहितको २२ लाख ४ हजार ४२७ रुपैयाँ महसुल बुझाएपछि लाइन पुनःजोडिएको छ । नेपालमा विद्युत् सेवा उपभोग गर्ने सर्वसाधारणले ६० दिनभन्दा बढी महसुल बक्यौता राख्नासाथ लाइन काटिने गरेको भएपनि सरकारकै कार्यालयहरूले भने लामो समय बक्यौता राख्ने गरेका छन् । पछिल्लो समय प्राधिकरणले बक्यौता महसुल उठाउने कार्यलाई तदारुकताका साथ अगाडि बढाएको छ ।
याे पनि पढ्नुहाेस्
पोखरा वितरण केन्द्र अन्तर्गत सबैभन्दा बढी बक्यौता भएको कास्की कारागारको लाइन काटियो
