ऊर्जा खबर
काठमाडौं । नेपाल आयल निगमले पेट्रोल, डिजेल र मट्टीतेलको मूल्य प्रतिलिटर दुई–दई रुपैयाँले बढाएको छ । निगमले आइतबार राति १२ बजेदेखि लागु हुने गरी पेट्रोलियम पदार्थको मूल्य समायोजन गरेको हो ।
नयाँ मूल्यअनुसार निगमको डिपो क्षेत्रको १५ किलोमिटर परिसरभित्रका लागि पेट्रोल प्रतिलिटर १ सय २०, डिजेल र मट्टीतेल प्रतिलिटर १ सय ३ रुपैयाँ कायम भएको छ । हवाई इन्धन र एलपी ग्यासको मूल्य भने हाललाई यथावत नै राखिएको छ ।
पछिल्लो पटक अप्रिल १ मा इन्डियन आयल कर्पोरेशन (आईओसी) ले पठाएको मूल्यअनुसार नै मूल्य समायोजन गरिएको निगम प्रवक्ता विनितमणि उपाध्यायले बताए । उनले मूल्य समायोजन नगर्दा मासिक १ अर्ब ९ करोड रुपैयाँ घाटा हुने अवस्था रहेकोले मूल्य समायोजन गर्नु परेकाे बताए ।
मूल्य समायोजनपश्चात पनि पेट्रोलमा प्रतिलिटर ७.३९ रुपैयाँ, डिजेलमा १.९४ रुपैयाँ तथा खाना पकाउने एलपी ग्यासमा ४१८.४७ रुपैयाँ घाटा भई अर्धवार्षिक रुपमा करिब ८८ करोड रुपैयाँ बराबरको नोक्सान हुने निगमले जनाएको छ ।
मूल्य बढाउँदासमेत भारतीय सीमा नाका रक्सोलसँग जोडिएको नेपालको वीरगञ्ज क्षेत्रमा प्रतिलिटर पेट्रोल ३०.४७ रुपैयाँ र डिजेल ३६.६३ रुपैयाँ नेपालतर्फ नै सस्तो रहेको निगमले सार्वजनिक गरेको विज्ञप्तीमा उल्लेख छ । निगमले आर्थिक वर्ष सुरु भएदेखि हालसम्म १२ पटक इन्धनको मूल्य समायोजन गरेको छ।
