ऊर्जा खबर
काठमाडौं । नेपाल आयल निगमले डिजेल र मट्टितेलको मूल्य प्रतिलिटर १०/१० रुपैयाँ घटाएको छ । भारतीय आयल कर्पोरेसन (आईओसी) ले पेट्रोलियम पदार्थको मूल्य घटाएर पठाएपछि निगमले डिजेल र मट्टितेलकाे मूल्य प्रतिलिटर १० रुपैयाँ घटाएको हो ।
निगम सञ्चालक समितिको मंगलबार (बैंशाख २ गते) साँझ बसेको बैठकले डिजेल र मट्टितेलको मूल्य घटाउने र पेट्रोलको मूल्य यथावत राख्ने निर्णय गरेको हो । मूल्य घटेपछि डिजेल र मट्टितेलको खरिद मूल्य १५५ रुपैयाँ प्रतिलिटर कायम भएको छ ।
आइओसीले पेट्रोल ९.५१ रुपैयाँ र डिजेल ८.०८ रुपैयाँ घटाएर पठाएकाे थियाे । मूल्य घटेर आएपछि निगमले नेपाली बजारमा पनि समायोजन गरेको हो ।
आइओसीको बक्यौता एवं नेपाल सरकारद्वारा उपलब्ध गराइएको ऋणको व्यवस्थापन गर्न अझै चुनौती नै रहेको अवस्थामा पनि आम उपभोक्ताको हितलाई मध्यनजर गर्दै मूल्य समायोजना गरेको निगमले जनाएको छ ।
