ऊर्जा खबर
काठमाडौं । नेपाल टेलिकम पाल्पाले ट्रंक लाइन प्रयोग गरेवापत साढे १२ लाख रुपैयाँ विद्युत् महसुल बक्यौता बुझाएको छ । टेलिकमले नेपाल विद्युत् प्राधिकरण, पाल्पा वितरण केन्द्रलाई बक्यौता महसुल बझाएको हो ।
केन्द्रले बारम्बार ताकेता गरेपछि बाँकी बक्यौता बुझाएको केन्द्र प्रमुख दिलिम मरासिनीले बताए । ‘टेलिकमले १२ लाख ३३ हजार ५०९ रुपैयाँ बक्यौता बुझाएको छ,’ उनले ऊर्जा खबरसँग भने, ‘टेलिकमले ट्रंक लाइन प्रयोग गरेवापतको सबै बक्यौता रकम चुक्ता गरेकाे छ ।’
केन्द्र अन्तर्गत टेलिकमसँगै अन्य तीन संस्थाले पनि ट्रंक लाइनबाट बिजुली प्रयोग गरिरहेका छन् । यी सबै कम्पनीले भने बक्यौता बुझाइसकेको पनि उनले बताए । उनले केन्द्र अन्तर्गतका अन्य साधारण ग्राहकहरूले पनि नियमित महसुल बुझाइरहेको जानकारी दिए ।
८०० काठको जिर्ण पोल
पाल्पा वितरण केन्द्रले ८०० काठकाे जिर्ण पोल फेर्न तयारी गरिरहेको छ । केन्द्र अन्तर्गत रहेको जिर्ण पोल आगामी आर्थिक वर्ष (आव) भित्र दुई चरणमा प्रतिस्थापन गर्ने योजना रहेको मरासिनीले बताए ।
पहिलो चरणमा वा चालु आवभित्र अति जिर्ण पोल बदली गर्ने र दोस्रो चरण वा आगामी आवभित्र जिर्ण पोल हटाई स्टिलको पोल राख्ने केन्द्रको लक्ष्य छ । यसैगरी, केन्द्रले चालु आवभित्र पाल्पालाई पूर्ण विद्युतिकरण गर्ने लक्ष्यका साथ काम गरिरहेको छ ।
