ऊर्जा खबर
काठमाडौं । दर खोला हाइड्रो पावरले ६.५ मेगावाटको दर खोला जलविद्युत आयोजना निर्माण गर्ने भएको छ । कम्पनीले अध्ययन पुरा भएको यस आयोजनाको निर्माण प्रक्रिया अघि बढाउन विद्युत विकास विभागमा आवेदन दिएको हो ।
म्याग्दी जिल्लाको धवलागिरि गाउँपालिका वडा नम्बर ३ साबिक मुना गाविस अन्तर्गत उक्त मेगावाटको आयोजना निर्माण अनुमतिका लागि विभागमा आवेदन दिएको कम्पनीले जनाएको छ । कम्पनीका अनुसार विभागबाट अनुमति प्राप्त हुने लगतै आयोजना निर्माणको काम सुरु गरिनेछ ।
आयोजना निर्माण तथा सञ्चालन गर्दा यसबाट पर्न सक्ने प्रतिकुल असका विषयमा सरोकारवालसँग राय/सुझाव माग गरेको छ । विभागले ३५ दिने सूचना जारी गर्दै उक्त अवधिभित्र सुझाव दिन पनि माग गरेको हाे ।
नदी प्रवाहमा आधारित (रन अफ रिभर) प्रकारको आयोजनाको बिजाइन बहाव १.४४ घनमिटर प्रति सेकेन्ड र कुल हेड ५४८ मिटर हुनेछ । आयोजनाबाट वार्षिक सरदर ३५.९८ गिगावाट घण्टा विद्युत उत्पादन हुनने अध्ययनले देखाएको छ ।
आयोजनाको मुख्या संरचनाहरु दर खोलाको बायाँ किनारमा पर्दछन् भने आयोजनाको हेडवक्र्स धवलागिरी गाउँपालिका वडा नम्बर ३ मा पर्दछ । दर खोलाको पानीलाई १२.१७ मिटर लामो र १ मिटर उचाईको डाइभर्सन वाएर निर्माण गरी ३ वटा साइड इन्टेक पाइपबाट जम्मा गरिनेछ । यसरी जम्मा गरेको पानी सतही विद्युत गृहमा पुर्याइनेछ ।
विद्युतगृह नजिकै स्वीचयार्ड निर्माण गरिनेछ र ७ किलोमिटर लामो ३३ केभी प्रसारण लाइन मार्फत डाँडाखेतमा प्रस्तावित सबस्टेसन हुँदै राष्ट्रिय प्रसारण लाइनमा जोडिनेछ ।
यो आयोजनाबाट ३ वर्षपछि विद्युत उत्पादन गर्ने लक्ष्य लिएको छ । आयोजना निर्माण तथा सञ्चालन गर्दा भू–क्षय, वायु प्रदुषण आदिद्वारा वातावरणमा उल्लेखनीय असर नपर्ने गरी निर्माण गरिने कम्पनीले जनाएको छ ।
