ऊर्जा खबर
काठमाडौं । तेह्रथुम पावर कम्पनी लिमिटेड र पिपुल्स पावर लिमिटेडले हकप्रद सेयर निष्कासन गर्ने तयारी गरेका छन् । कम्पनीले नयाँ जलविद्युत् आयोजनामा लगानी गर्नका लागि सेयर निष्कासन गर्न लागेका हुन् ।आफ्नो सेयरधनी सदस्यहरूका लागि हकप्रद सेयर निष्कासन प्रक्रिया अघि बढाएका कम्पनीले जानकारी दिएका छन् ।
तेह्रथुमले १ बराबरको १ को अनुपातमा हकप्रद सेयर निष्कासन गर्ने भएको छ । कम्पनीले आगामी पुस २१ गते हुने छैठौं साधारणसभाले पारित गरेपछि सेयर निष्कासन गरी बाँडफाँड गर्नेछ ।
तेह्रथुममा ७.५ मेगावाटको माथिल्लो खोरुङ्गा खोला जलविद्युत् आयोजना निर्माण गरि सञ्चालन गरिरहेको उक्त कम्पनीले २ मेगावाटको खोरुङ्गा ताङ्गमाया खोला क्यासकेड जलविद्युत् आयोजना निर्माण गर्ने भएको छ ।
हकप्रद सेयर निष्कासन पश्चात प्राप्त भएको रकम कम्पनीले खोरुङ्गा ताङ्गमाया क्यासकेड निर्माण गर्न र अन्य लाभदायक हाइड्रो पावर कम्पनीमा लगानी गर्ने कम्पनीको योजना छ ।
यसैगरी, पिपुल्स पावरले चुक्ता पुँजीको १ः०.५ को अनुपातमा हकप्रद सेयर निष्कासन गर्ने भएको छ । कम्पनीको मंसिर १७ गते (आइतबार) बसेको सञ्चालक समितिको बैंठकले हकप्रद सेयर निष्कासन गर्ने निर्णय गरेको कम्पनीले जनाएको छ ।
कम्पनीले आयोजनाको नियमित मर्मत संभार गर्न, भुक्तानी बाँकी हिसाब फरफारक गर्न र नयाँ आयोजनामा लगानीमा गर्न साथै लगानीका स्रोतहरू पहिचान गर्दै रोजगारी सिर्जना गरी राष्ट्रिय पुँजी वृद्धि गर्न हकप्रद सेयर निष्कासन गर्ने निर्णय गरेको हो । कम्पनीको इलाममा ४.९६ मेगावाटको पुवा–२ जलविद्युत् आयोजना निर्माण गरी सञ्चालन गरिरहेको छ ।
.jpg)
