ऊर्जा खबर
काठमाडौं । नेपाल आयल निगमले भारतीय आयल निगम (आइओसी) र सरकारलाई २९ अर्ब ११ लाख तिर्न बाँकी रहेको भन्दै पेट्रोलियम पदार्थको मूल्य नघटाउने जनाएको छ । निगम बिहीबार विज्ञप्ति सार्वजनिक गर्दै यस्तो जानकारी दिएको हो ।
निगमले आगामी १५ दिनमा करिब १८ करोड रुपैयाँ नाफा हुने प्रक्षेपण गरेपनि मूल्य नघटाउने विज्ञप्तिमा उल्लेख छ । पछिल्लो पटक १६ अक्टोबरमा भारतीय आयल कर्पोरेशनले पठाएको मूल्यसूचीअनुसार पेट्रोल, डिजेल लगायत अन्य पेट्रोलियम पदार्थको मूल्य बढेर आएकोले २० महिनापछि नाफामा रहेको निगमले जनाएको छ ।
नोभेम्बर १ को मूल्यसूची अनुसार पेट्रोलमा प्रतिलिटर ६१ पैसा, डिजेलमा ५.७६ रूपैयाँ, मट्टितेलमा ४.१, हवाई इन्धनमा ४.७७ रूपैयाँ बढेर आएको निगमले जनाएको छ । खाना पकाउने एलपी ग्यासमा केही घटेर आए पनि निगमले हाल डिजेलमा प्रतिलिटर १२.१४ रूपैयाँ र एलपी ग्यासमा २२८.८४ रूपैयाँ प्रतिसिलिण्डर घाटा रहेको छ ।
निगमका अनुसार १५ दिनमा डिजेलमा ५८ करोड १० लाख र ग्यासमा २६ करोड ३२ लाख रुपैयाँ घाटा हुने भएपनि पेट्रोल, हवाई इन्धन र मट्टितेलमा हुने नाफाले निगमलाई समग्रमा नाफा हुने विज्ञप्तिमा उल्लेख छ ।
अन्तर्राष्ट्रिय बजारमा कच्चा तथा प्रशोधित पेट्रोलियम पदार्थको मूल्य पुनः बढ्ने क्रममा रहेको तथा अमेरिकी डलरसँग नेपाली मुद्राको विनिमय दर कमजोर हुँदै गएको कारण देखाउँदै तत्काल मूल्य घटाउन नसकिने निगमले जनाएको छ ।
भारतीय आयल कर्पोरेशनलाई तिर्नुपर्ने बक्यौता र सरकारले उपलब्ध गराएको ऋणको व्यवस्थापन गर्न अझै चुनौतिपूर्ण अवस्था रहेको जनाइएको छ । यस विषम परिस्थिति एवं बाध्यात्मक अवस्थालाई दृष्टिगत गरी हाललाई पेट्रोलियम पदार्थको साबिकको खुद्रा बिक्री मूल्य यथावत राखिएको विज्ञप्तिमा उल्लेख छ ।
