भूकम्पपछि उद्धार र राहतमा खटिएका दुई निकायको हवाई इन्धन खर्च निगमले व्यहोर्ने 

काठमाडौं । कर्णालीको जाजरकोट क्षेत्रमा शुक्रबार मध्यराती गएको भूकम्पपछिको उद्धार र राहत वितरण कार्यमा खटिएका दुई निकायले दिइरहेकाे हवाइ सेवामा हवाई इन्धनकाे खर्च नेपाल आयाल निगमले व्यहोर्ने भएको छ । निगमले नेपाल एयरलाइन्सका हवाईजहाजहरू र नेपाली सेनाका हेलिकोप्टले उक्त कार्यमा खपत गर्ने इन्धनको खर्च व्यहोर्ने घोषणा गरेको हो । 

शनिबार साँझ निगमले एक विज्ञप्ति जारी गरी उक्त कार्यमा ती दुई निकायका जहाजमा लागेको इन्धनको खर्च आफ्नो सामाजिक उत्तरदायित्व बहन (सिएसआर) शीर्षकबाट व्यहोर्ने जनाएको छ । हाल उक्त भूकम्प प्रभावित क्षेत्रमा उद्धार र राहतको काम जारी रहेको छ । 

जाजरकोट केन्द्रविन्दु बनाएर शुक्रबार राती गएको भूकम्पमा कम्तिमा १३८ भन्दा बढीले ज्यान गुमाएका छन् । धेरै मानिस घाइते भएका छन् भने धेरै धनमालको क्षति भएको छ ।