ऊर्जा खबर
काठमाडौँ । भोटेकोशीको विनाशकारी बाढीको विपत्पछि बङ्गलादेशमा विद्युत् निर्यात बन्द भएको छ । भदौ १० गते आएको बाढीले २४ मेगावाटको त्रिशूली र २२ मेगावाटको चिलिमे जलविद्युत् केन्द्र ध्वस्त भएपछि निर्यात रोकिएको हो ।
अन्य केन्द्रको बिजुली बङ्गलादेशमा निर्यात गर्ने अनुमति तथा सम्झौता नरहेकोले विद्युत् निर्यात बन्द गर्नुपरेको नेपाल विद्युत् प्राधिकरणका प्रवक्ता राजन ढकाले बताए । यद्यपि, अन्य उत्पादन केन्द्रबाट सोही परिमाणको बिजुली बङ्गलादेश पठाउन बङ्गलादेश तथा भारतका सम्बन्धित निकायमा प्रस्ताव पठाइएको उनले जानकारी दिए । विपत्पछि प्राधिकरण हाल पीडितहरूको खोज, उद्धार, राहत तथा पुनर्स्थापनाकाको कार्यमा केन्द्रित रहेको बताउँदै उनले उक्त प्रस्तावपछिको प्रगतिबारे भने खुलाएनन् ।
२०८१ असोज १७ गते नेपाल विद्युत् प्राधिकरण, बंगलादेश पावर डेभलपमेन्ट बोर्ड र एनटिपिसी विद्युत् व्यापार निगम लिमिटेड भारतबीच यी २ आयोजनाबाट ४० मेगावाट बिजुली विद्युत् बङ्गलादेश निर्यात गर्ने सम्झौता भएको थियो । त्यसपछि त्रिशूलीबाट १८.६० मेगावाट र चिलिमेबाट २१.४० गरी कुल ४० मेगावाट विद्युत् बंगलादेश निर्यात हुँदै आएको थियो ।
सम्झौता अनसार प्राधिकरणले ५ वर्षका लागि हरेक वर्ष वर्षायामका ६ महिना (१५ जुन–१५ नोभेम्बरसम्म) विद्युत् बंगलादेश निर्यात गर्दै आएको थियो । उक्त बिजुलीको बिक्री दर प्रतियुनिट ६.४० अमेरिकी सेन्टका रहेको थियो ।
