८४ मेगावाट विद्युत प्रवाह हुने १३२ केभी प्रसारण लाइन निर्माण हुँदै

काठमाडौं । गण्डकी प्रदेशको कास्की जिल्लामा ८४.५९५ मेगावाट विद्युत प्रवाह हुने प्रसारण लाइन निर्माण हुने भएको छ । भिजन लुम्बिनी ऊर्जा कम्पनी लिमिटेडले २५ मेगावाटको सेतीनदी जलविद्युत आयोजनाको स्विचयार्डदेखि नेपाल विद्युत प्राधिकरणको लाहाचोक सबस्टेसनसम्म लाइन निर्माण गर्न लागेको हो ।

अध्ययन पूरा भएको लाइनको निर्माण अनुमतिका लागि आवेदन परेको विद्युत विकास विभागले जनाएको छ । विभागका अनुसार निर्माण अनुमतित्र दिन ३५ दिने सूचना जारी गरिएको छ । अनुमतिपत्र दिनु अघि प्रसारण लाइन निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय/सुझाव माग गरेको छ ।

३.६८७ किलोमिटर लामो लाइनमा १७ वटा निर्माण हुनेछ । जमिनको सतहबाट टावरको उचाइ ३५.५ मिटर तथा टावरहरूको दुरी ३८४.९३ मिटर तथा अधिकतम ३८५.०७ मिटर हुनेछ । लाइनको काम २०८० साउनभित्र पूरा गरिने लक्ष्य रहेको कम्पनीले जनाएको छ ।

सेती नदी आयोजनाको काम ६० प्रतिशत बढी पूरा भएको छ । यो आयोजनाको सबै काम पूरा गरेर २०८० भदौभित्र पूरा गरिनेछ ।