ऊर्जा खबर
काठमाडौं । तनहुँको पर्यटकीय नगरी बन्दीपुरमा निर्माणाधीन अवस्थामा रहेको केबुलकार र यसकोे सेयर एकैसाथ खुुल्ला हुने भएको छ । सेयर निष्कासनका लागि एसबिआई मर्चेन्टसँग सम्झौता भइसकेले केबुलकार र सेयर २०८० बैशाखदेखि खुल्ला गर्ने तयारी भइरहेको हो ।
केबुलकारका लागि आवश्यक पर्ने सामान र जनशक्ति बाहिरबाट ल्याइसकिएको छ । केबुलकारबाट बन्दीपुर गाउँपालिका–४ ठूल्ढुङ्गामा तल्लो स्टेसन र सोही वडाको बरालथोकसम्म १.६ किलोमिटर दूरी गर्न सकिनेछ ।
समयअनुरुप पर्यटकहरूलाई नयाँपन दिनका लागि निर्माण भइरहेकाे केबुलकारभित्र रेष्टुरेन्ट सञ्चालन गर्ने योजना रहेको बन्दीपुर केबुलकार एन्ड टुरिजम लिमिटेडका अध्यक्ष रामचन्द्र शर्माले बताए । उनका प्रत्येक दिन साँझ ५ बजेपछि केबुलकारले मानिस बोक्ने व्यवस्था बन्द गरी उक्त सेवा सञ्चालन गरिनछ ।
इच्छुक पर्यटकहरूले केबुलकार रिजर्भ गरी केबुलकार भित्रको रेष्टुरेन्टमा मनोरञ्जन लिन पाउनेछन् । ‘केबुलकारभित्र ग्लासको क्याबिन जडान गरिनेछ’ उनले भने, ‘रेष्टुरेन्टका लागि २५ हजार रुपैयाँ शुल्क तिरेपछि खाना, बस्न, सुत्न लगायतका सबै सुविधाको व्यवस्था हुनेछ ।’
केबुलकार भित्रै शौचालय सहितको सुविधासम्पन्न बनाउनका लागि कति लोड धान्न सक्छ भनेर अनुसन्धान कार्य पनि भइरहेको छ’ उनले थपे । अघिल्लो दसैदेखि केबुलकार सञ्चालन गर्ने तयारी गरिए पनि कृत्रिम अभावका कारण सामान समयमा पाउन नसक्दा निर्माणमा ढिलाइ हुन गएपछि अन्य थप सुविधा थप्दै व्यवस्थित गर्न लागिएको शर्माले बताए ।
एसियाकै ठूलो दाबी गरिएको बिमलनगरस्थित सिद्धगुफा र प्राकृतिक दृश्यावलोकनका लागि उपयुक्त बन्दीपुर घुम्न आउने पर्यटकका लागि आकर्षणको केन्द्रविन्दु बन्ने विश्वास गरिएको छ । बन्दीपुर केबुलकार एन्ड टुरिजमको लागि१ अर्ब ६६ करोड ८९ लाख रुपैयाँ लागत अनुमान गरिएको छ ।
केबुलकार र चारतारे होटल निर्माणसहित कूल ३ अर्ब रुपैयाँ लाग्ने देखिएको अध्यक्ष शर्माले बताए । पहिला गरिएको सामानको इष्टिमेटको तुलनामा कम्तीमा २५ प्रतिशत सामानको मूल्य वृद्वि भएकाले लागत बढ्ने सङ्केत देखिएको हो ।
