ऊर्जा खबर
काठमाडौँ । नेकपा माओवादी केन्द्रका उप–महासचिव एंव पूर्व ऊर्जा जलस्रोत तथा सिँचाइ मन्त्री वर्षमान पुनले निर्माणाधीन १३२ केभी घोराही–खुंग्री प्रसारण लाइनको निरीक्षण गरेका छन् । रोल्पाबाट निर्वाचित प्रतिनिधिसभाका सदस्यसमेत रहेका पुनले आइतबार आयोजनाको स्थलगत निरीक्षण गरेका हुन् ।
उनले खुंग्रीस्थित आयोजनास्थल पुगेर सम्बन्धित कर्मचारी र निर्माण कम्पनीका प्रतिनिधिसँग कामको प्रगतिबारे जानकारी लिए । आयोजनाको हालसम्मको प्रगति सन्तोषजनक रहेको भन्दै पुनले यही रफ्तारमा काम भए पूर्वनिर्धारित समयसीमाभित्रै काम सम्पन्न हुने विश्वास व्यक्त गरे ।
‘ऊर्जामन्त्री भएका बेला मैले नै अघि बढाएको योजना भएकोले पनि मेरो यसमा चासो छ’, उनले भने, ‘प्रसारण लाइन निर्माणका क्रममा कुनै समस्या आइपरे मलाई जानकारी गराउनुहोस्, सबै प्रकारको सहयोगका लागि तयार छु ।’ उनले आयोजना समयमै सम्पन्न गर्न आवश्यक सहयोग तथा सहजीकरणका लागि तयार रहेको प्रतिबद्धता जनाए ।
यो लाइन पूरा भएपछि रोल्पा, रुकुम र प्यूठान क्षेत्रमा राष्ट्रिय प्रसारण प्रणालीको विद्युत्काे पहुँच पुग्ने र त्यस क्षेत्रमा निर्माणाधीन तथा निर्माणमा जाने तयारीमा रहेका आयोजनाको बिजुली प्रसारण प्रणालीमा जोडिनेछ ।
घोराहीदेखि खुंग्रीसम्म ४० किलोमिटर लामो लाइन निर्माण हुनेछ । एसियाली विकास बैंकको २ अर्ब रुपैयाँ लगानीमा यसको निर्माण भइरहेको छ । लाइन निर्माण गर्न २०७९ पुस २४ गते हस्ताक्षर भएको थियो ।
भारतीय कम्पनी केइसी इन्टरप्राइजेजले सम्झौताअनुसार १ फागुन २०७९ बाट काम थालेको हो । ३० महिना अर्थात २०८२ भदौभित्र लाइन निर्माणको काम सम्पन्न गर्ने गरी सम्झौता भएको थियो ।
हालसम्म १५ प्रतिशत भौतिक प्रगति भइसकेको आयोजनाका इन्जिनियर प्रदीप खत्रीले जानकारी दिए । रोल्पामा जग्गा अधिग्रहणको काम सकिएको तथा दाङ र प्यूठानको पनि जग्गा अधिग्रहणका लागि सूचना प्रकाशित भएर प्रक्रिया अघि बढेको खत्रीले बताए ।
