सगरमाथाको साढे ५४ लाख कित्ता सेयर निष्कासन गर्न धितोपत्र बोर्डको अनुमति

काठमाडौं । नेपाल धितोपत्र बोर्डले सगरमाथा जलविद्युत कम्पनी लिमिटेडको करिब साढे ५४ लाख साधारण सेयर निष्कासन गर्न अनुमति दिएको छ । बोर्डले कम्पनीको आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न अनुमति दिएको हो ।

कम्पनीको ५४ लाख ८८ हजार कित्ता साधारण सेयर निष्कासन गर्न आइतबार (पुस १७ गते) अनुमति दिएको बोर्डले जनाएको छ । बोर्डका अनुसार कम्पनीले स्थानीय र सर्वसाधारणका लागि ५४ करोड ८८ लाख रुपैयाँ बराबरको साधारण सेयर निष्कासन गर्नेछ ।

कम्पनीको सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ । कम्पनीको इलाममा ९.६ मेगावाटको सुपर माइ खोला जलविद्युत आयोजना सञ्चालनमा छ । केन्द्रले २०७७ जेठ २३ गतेदेखि नियमित विद्युत उत्पादन गरिरहेको छ ।