एबीपी इनर्जीले तादी खोलामा निर्माण गर्ने ८ मेगावाटको 'तादी-घ्याङफेदी'को पीपीए सम्पन्न

काठमाडौँ । एबीपी इनर्जी प्रालिले प्रवर्द्धन गरेको ८ मेगावाटको तादी-घ्याङफेदी जलविद्युत् आयोजनाको विद्युत खरिद बिक्री सम्झौता (पीपीए) सम्पन्न भएको छ । नेपाल विद्युत प्राधिकरण र एबीपी इनर्जीका प्रतिनिधिबीच सोमबार पीपीएमा हस्ताक्षर भएको हो ।

पीपीएमा प्राधिकरण विद्युत् व्यापार विभागका निर्देशक राजन ढकाल र कम्पनीका अध्यक्ष पूर्णलाल श्रेष्ठले हस्ताक्षर गरे । नुवाकोटको दुप्चेश्वर गाउँपालिका-१ तादी खोलामा निर्माण हुने आयोजनाको हालसम्म सबै खालको अध्ययन पूरा भएको कम्पनीले जानकारी दिएको छ ।

२०८० साल बैशाखमै आयोजनाको विस्तृत अध्ययन प्रतिवेदन (डीपीआर) पूरा भइसकेको आयोजना ग्रस हेड ४४६ मिटर रहेको छ । हेडरेस पाइप २२८१.३६ मिटर र पेनस्टक पाइप १६३२.०८ मिटर निर्माण गरिने आयोजनाको विद्युत् ३३ केभी सिंगल सर्किट प्रसारण लाइनमार्फत १० किलोमिटर टाढा समुन्द्रटार सबस्टेसनमा जोडिने उल्लेख छ ।

१ अर्ब ६४ करोड रुपैयाँ लागत अनुमान गरिएको आयोजना प्रतिमेगावाट २० करोड ५ लाख रुपैयाँमा पूरा गर्ने लक्ष्य छ । आगामी असोज २९ गतेबाट निर्माण शुरू गरिने आयोजनाबाट वार्षिक ४८.७४६ गिगावाट घण्टा (४ करोड ८७ लाख ४६ हजार युनिट) विद्युत् उत्पादन हुनेछ भने २०८४ बैशाख (३१ महिना) सम्म व्यावसायिक उत्पादन गर्ने लक्ष्य राखिएको छ ।

उत्पादित विद्युत् ३३ केभी प्रसारण लाइनमार्फत १० किलोमिटर दूरीमा रहेको प्राधिकरणको समुन्द्रटार सबस्टेसनमा जोडिने छ । यस कम्पनीको सञ्चालकमा स्वतन्त्र ऊर्जा उत्पादकहरूको संस्था इपानका महासचिव बलराम खतिवडादेखि सूचना प्रविधि व्यवसायी असगर अलि लगायतको संलग्नता रहेकाे छ ।