ऊर्जा खबर
काठमाडौँ । हाइड्रोइलेक्ट्रिसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआइडिसिएल) ले भदौ १० गते आएको विनाशकारी भोटेकोशी बाढीबाट प्रभावितकाे उद्धार, राहत तथा पुनर्स्थापना का लागि १ करोड १ लाख रुपैयाँ आर्थिक सहयोग गरेको छ । कम्पनीले उक्त रकम ऊर्जा, जलस्रोत तथा सिँचाइ मन्त्री विराजभक्त श्रेष्ठमार्फत प्रधानमन्त्री दैवी प्रकोप उद्धार कोषमा उपलब्ध गराएको हो ।
कम्पनीले संस्थागत सामाजिक उत्तरदायित्वअन्तर्गत उपलब्ध गराएको उक्त सहयोगले बाढीबाट प्रभावित क्षेत्रमा तत्कालीन मानवीय सहायता तथा राहतमा योगदान पुग्ने अपेक्षा गरिएको छ । बाढीका कारण रसुवा, नुवाकोटलगायत त्रिशूली नदी करिडोरमा ठूलो जनधनको क्षति हुनुका साथै जलविद्युत् आयोजना, प्रसारण तथा वितरण संरचना, सडक, पुल र अन्य स्थानीय पूर्वाधारमा समेत गम्भीर क्षति पुगेको छ ।
विपद्पछिको तत्कालीन राहत तथा उद्धारसँगै प्रभावित त्रिशूली करिडोरको शीघ्र पुनरुत्थान, पुनर्निर्माण तथा जलवायु उत्थानशील पुनर्स्थापनाका लागि ठूलो परिमाणमा दीर्घकालीन वित्तीय स्रोत आवश्यक पर्ने देखिएको छ ।
यसै सन्दर्भमा एचआईडीसीएलले प्रभावित जलविद्युत् तथा ऊर्जा पूर्वाधारको पुनरुत्थानका लागि छुट्टै ‘त्रिशूली करिडोर पुनरुत्थान तथा उत्थानशीलता वित्तीय संरचना’ विकास गर्न अग्रणी भूमिका निर्वाह गर्ने प्रतिबद्धतासमेत जनाएको छ ।
कम्पनीका अनुसार यस्तो वित्तीय संरचनामार्फत बाढीबाट क्षतिग्रस्त ऊर्जा पूर्वाधारको पुनर्निर्माणसँगै भविष्यमा यस्ता विपत्बाट हुने क्षति न्यूनीकरण गर्ने गरी उत्थानशील पूर्वाधार विकासमा समेत सहयोग पुग्ने अपेक्षा गरिएको छ ।
