तनहुँ जलविद्युत्‌को विद्युत्‌गृह 'कङ्क्रिटिङ' पूरा, अन्य उपकरण निर्माणको प्रगति ५९ प्रतिशत

तनहुँ । तनहुँमा निर्माणाधीन १४० मेगावाटको तनहुँ जलविद्युत् जलाशय आयोजनाको विद्युत्‌गृह कङ्क्रिटङ गर्ने काम पूरा भएको छ । ऋषिङ गाउँपालिका–१ झापुटारमा निर्माण भइरहेको आयोजनाको प्याकेज-२ अन्तर्गतको यो काम  सकिएको हो ।

प्याकेज-२ को ठेक्का पाएको सिनो हाइड्रो कर्पोरेशनले उक्त काम पूरा गरेको आयोजना प्रमुख श्यामजी भण्डारीले बताए । ‘विद्युत्‌गृहभित्र संरचना बनाउने काम चलिरहेको छ, सोही बमोजिम पहिलो चरणको काम पूरा भयो,’ उनले भने, 'विद्युत्‌गृह तथा सम्बन्धित उपकरण निर्माणमा हालसम्म ५९ प्रतिशत प्रगति भएको छ ।'

आयोजनाका अनुसार सुरुङतर्फ पेनस्टक पाइप जडान, वेल्डिङको काम भइरहेको छ । मुख्य सुरुङ २०८० चैत १८ गते ‘ब्रेक थ्रु (वारपार) भएको आयोजनाका अन्य कामहरू समानान्तररूपमा भइरहेको कम्पनीले जनाएको छ ।