ऊर्जा खबर
काठमाडौं । सरकारले विद्युत विकास विभागको महानिर्देशकमा सन्दीपकुमार देवलाई नियुक्त गरेको छ । ऊर्जा, जलस्रोत तथा सिँचाइ मन्त्रालयका सहसचिव देवलाई मंगलबार महानिर्देशक नियुक्त गरिएको हो ।
उनले मंगलबार नै मन्त्रालयबाट नियुक्तीपत्र बुझेका छन् । बुधबारदेखि विभागमा हाजिर हुने देवले ऊर्जा खरबलाई बताए । मन्त्रालयमा आउनुअघि उनी विभागको उपमहानिर्देशक थिए । २०६२ सालमा विभाग प्रवेश गरेका देव २०७७ सालसम्म विभागमा कार्यरत थिए ।
सिजियर डिभिजनल इन्जिनियरबाट सुरुवात गरेका उनी ५ वर्षसम्म विभागको उपमहानिर्देशकको जिम्मेवारीमा थिए । मन्त्रालयमा आएको ९ महिनापछि फेरि उनको विभागमै सरुवा भएको हो । निवर्तमान महानिर्देशक नविनराज सिंहलाई मन्त्रालय मातहतको जल तथा ऊर्जा आयोगमा सरुवा गरिएको छ ।
दोस्रो पटक विभागको महानिर्देशक भएका सिंहलाई १ वर्ष ९ महिनापछि आयोगमा सरुवा गरिएको हो । यसअघि पनि सिंहले २ वर्ष २ महिना उक्त जिम्मेवारीमा रही विभागमा काम गरेका थिए । सिंह मंगलबार नै आयोगमा हाजिर भएका छन् ।
जलस्रोत तथा सिँचाइ विभागका महानिर्देशक मधुकरप्रसाद राजभण्डारी मन्त्रालयमा सरुवा भएका छन् । सुनकाेसी डाइभर्सन आयोजना प्रमुख शुशील आचार्यलाई भने जलस्रोत तथा सिँचाइ विभागकाे महानिर्देशक बनाइएकाे छ ।
