ऊर्जा खबर
काठमडौं । कर्णाली प्रदेशका विभिन्न जिल्लामा करिब ७ हजार मेगावाटका आयोजनाको अध्ययन भइरहेको छ । प्रदेशको १० जिल्लामा पहिचान भएका आयोजनाको निर्माण प्रक्रिया अघि बढाउन अध्ययन भइरहेको हाे ।
विद्युत विकास विभागका अनुसार विभिन्न जिल्लामा पहिचान भएका ६७८२ मेगावाटका आयोजनाको अध्ययन भइरहेको छ । कर्णाली प्रदेशको पश्चिम रुकुम, सल्यान, डोल्पा, हुम्ला, जुम्ला, कालिकोट, मुगु, सुर्खेत, दैलेख र जाजरकोटमा आयोजनाको पहिचान गरी अध्ययन अनुमति लिई अध्ययनको प्रक्रिया अघि बढाइएको छ ।
प्रदेशमा पहिचान भई अघि बढेको आयोजनामध्ये १०० मेगावाटदेखि ५ सय मेगावाट क्षमताका सम्मका ३८०१ मेगावाटका आयोजनाको अध्ययन भइरहेको विभागले जनाएको छ । यस्तै, ५ मेगावाट क्षमताभन्दा बढी क्षमताका १९०२ मेगावाटको आयोजनाको अध्ययन भइरहेको छ ।
२५ मेगावाटदेखि १०० मेगावाट क्षमतासम्मका २७९ मेगावाटका आयोजना, ५ देखि २५ मेगावाट क्षमतासम्मका ३२ मेगावाटका आयोजना र ५ मेगावाटभन्दा कम क्षमताका २४ मेगावाटको आयोजनाको अध्ययन भइरहेको विभागले जनाएको छ ।
९०० मेगावाटका माथिल्लो कर्णाली विद्युत आयोजनादेखि ०.५ मेगावाट क्षमतासम्मका आयोजनाको अध्ययन भइरहेको छ । ३०० मेगावाटको भेरी–४, ४१७ मेगावाटको नलस्याउ गाड, २५६ मेगावाटको भेरी–२, २७० मेगावाटको भेरी–१, १९०२ मेगावाटको मुगु कर्णाली, ३०६ मेगावाटको माथिल्लो मुगु कर्णाली, १५२ मेगावाटको सुपर हुम्ला लगायतका आयोजनाको अध्ययन भइरहेको छ ।
विभागका अनुसार यो प्रदेशमा अध्ययन पूरा भएको ९०६ मेगावाटका आयोजनाले अध्ययन पूरा गरी उत्पादन अनुमति लिई आयोजना अघि बढाएका छन् । १०० मेगावाट क्षमतादेखि ५०० मेगावाटसम्मका ८६० मेगावाटका आयोजना, ५ मेगावाट क्षमतादेखि २५ मेगावाटसम्मका २८ मेगावाटका आयोजना र ५ मेगावाट भन्दा कम क्षमताका १८ मेगावाटका आयोजनाले उत्पादन अनुमति लिई निर्माणको चरणमा छन् ।
