ऊर्जा खबर
काठमाडौं । मकर जितुमाया सुरी हाइड्रोपावर कम्पनी लिमिटेडले साधारण सेयर निष्कासन गर्ने भएको छ । कम्पनीले दोलखामा निर्माणाधीन ७ मेगावाटको माथिल्लो सुरी खोला जलविद्युत आयोजनाको स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो ।
सय रुपैयाँमा अंकित २२ करोड ८० लाख रुपैयाँ बराबरको २२ लाख ८० हजार कित्ता सेयर निष्कासन गर्ने तयारी गरेको कम्पनीले जनाएको छ । कम्पनीका अनुसार कुल जारी पूँजीको ३० प्रतिशत सेयर निष्कासन गर्न लागिएको हो ।
निष्कासन हुने सेयरमध्ये आयोजना प्रभावित स्थानीयका लागि ७ लाख ६० हजार र सर्वसाधारणका लागि १५ लाख २० हजार कित्ता सेयर छुट्याइएको छ । सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक नियुक्त गरिएको छ ।
नियुक्ती सम्बन्धि सम्झौतामा कम्पनीका तर्फबाट कार्यकारी अध्यक्ष हिमाल गुरुङ र प्रभु क्यापिटलका तर्फबाट प्रबन्ध निर्देशक दिनेश थकालीले हस्ताक्षर गरेका छन् । अब, सेयर निष्कासन अनुमतिका लागि नेपाल धितोपत्र बोर्डमा अनुमतिका लागि आवेदन दिने तयारी भइरहेको छ ।
बोर्डबाट अनुमति पाएपछि पहिलो चरणमा स्थानीयका लागि र दोेस्रो चरणमा सर्वसाधारणका लागि छुट्याएको सेयर निष्कासन गरी बाँडफाँड गरिनेछ । कम्पनीले निर्माण गरिरहेको आयोजनामा डोल्मा इम्प्याक्ट फण्डको समेत लगानी रहेको छ ।
