ऊर्जा खबर
काठामाडौं । सिराहा जिल्लाको बरियारपट्टि गाउँपालिकाले नेपाल विद्युत प्राधिकरण लाहान वितरण केन्द्रलाई २० लाख रुपैयाँ बक्यौता बुझाएको छ । पालिकाले सिँचाई मिटरबाट विद्युत खपत गरे वापतको साे रकम बुझाएको हो ।
गाउँपालिकाका अध्यक्ष्य सन्तोष कुमार महतोले ८१९ जना ग्राहकको सिँचाई मिटरबाट विद्युत खपत भए वापतको २० लाख रुपैयाँ बक्यौता बुझाएको लहान वितरण केन्द्रका इन्जिनियर संयोग विश्वकर्माले बताए । उनका अनुसार पालिका अन्तर्गतका केही ग्राहकले भने आफैले बक्यौता बुझाए थिए ।
मिटर रिडङ गर्दा बक्यौता बुझाउन बाँकी रहेको ग्राहकको बक्यौता गाउँपालिकाले बुझाएको हो । अबका दिनमा पनि पालिका अन्तर्गत सिँचाइ गर्नेको बक्यौता पालिकाले नै दिने भएको छ ।
किसानहरुको सिँचाइ मिटर जडान गरेदखि जेठ मसान्तसको मिटर रिडिङ गर्दा २१ लाख ८ हजार रुपैयाँ बक्यौता उठेको पालिकाका अध्यक्ष सन्तोष कुमार महतोले बताए । उनका अनुसार पालिकाले बजेट बिनियोजना गर्दा छुट्याएको २० लाख रुपैयाँ बक्यौताका बुझाएको हो ।
‘आफु स्थानीय तहमा निर्वाचित हुँदा घोषणा गरेको कुरालाई कार्यान्वयन गरेको हो, उनले ऊर्जा खबरसँग भने, अबको दिनमा सिँचाई गरे बापतको विद्युत महशुल गाउँपालिकाले नै तिर्नेछ ।’
२ वर्ष अघि नै लागु गरे पनि प्राविधिक र मिटर रिडङ नभएको कारणले गर्दा बक्यौता बुझाउन नसकेको अध्यक्ष्य महतोले जानकारी दिए । पालिका अन्तर्गत सिँचाई मिटर जडान नगरेका किसानहरुले पनि सिँचाई मिटर जडान गरी काम गर्न महतोले आग्रह गरेका छन् ।
