ऊर्जा खबर
काठमाडौं । सोलुखुम्बुमा निर्माणाधीन ८६ मेगावाटको सोलु खोला (सोलु–दूधकोसी) जलविद्युत आयोजनाको डिसान्डरमा पानी भर्ने काम सम्पन्न भएको छ । निर्माण सम्पन्न डिसान्डरमा पानी भर्ने काम सकिएको हो ।
निर्माण पूरा भएको डिसान्डरमा पानी भरेर परिक्षण गरिएको प्रवर्द्धक साहास ऊर्जा कम्पनी लिमिटेडका अध्यक्ष हिम पाठकले बताए । डिसान्डरमा जडान भएको उपकरण ठिक छ की छैन हेर्न पानी भरेर जाँच गरिएको छ ।
निर्माणाधीन आयोजनाको काम अन्तिम चरणमा पुगेको छ । आयोजनाको ८५ प्रतिशत काम सकिएको छ । बाँकी काम पूरा गरेर आगामी ५ महिनाभित्र उत्पादन सुरु गर्ने लक्ष्य रहेको कम्पनीका जनसम्पर्क अधिकृत कैलाश निराैलाले जानकारी दिए ।
आयोजनाको ७ हजार ६ सय ५४ मिटर लामो सुरुङ खन्ने काम सकिएको छ । विद्युतगृह र बाँध क्षेत्रको काम पनि तिव्र गतिमा भइरहेको छ ।
आयोजनाबाट २०७९ असोजभित्र उत्पादन सुरु गर्ने लक्ष्य छ । आयोजनाबाट उत्पादीत विद्युत १३२ केभी सोलु कोरिडोर प्रसारण लाइनको तिन्लास्थित लम्माने सबस्टेसनमा जोडिनेछ । सबस्टेसनसम्मको आवश्यक १२ किलोमिटर लामो प्रसारण लाइन कम्पनी आफैले निर्माण गरिरहेको छ ।
आयोजनाबाट वार्षिक ५२९ गिगावाट घन्टा विद्युत उत्पादन हुनेछ । जसमा हिउँदमा १००.२७ गिगावाट घन्टा र वर्षामा ४१९ गिगावाट घन्टा विद्युत उत्पादन हुनेछ ।
आयोजना सम्पन्न गर्न ११ अर्ब ८६ करोड रुपैयाँ लागत अनुमान गरिएको छ । आयोजनामा नेपाल इन्भेसमेन्ट बैंकसहित ९ बैंकले ८ अर्ब ६५ करोड रुपैयाँ ऋण लगानी गरेका छन् । बाँकी साढे ३ करोड रुपैयाँ स्वपुँजी लगानी रहेको छ ।
सोलु खोला बेसिनमा सोलु–दुधकोसीबाहेक ८२ मेगावाटको तल्लो सोलु, १९.८ मेगावाटको माथिल्लो सोलु, ५ मेगावाटको जुनबेंसी, २३ं५ मेगावाटको सोलुलगायतका आयोजना रहेका छन् ।
