ऊर्जा खबर
काठमाडौं । सिन्धुपाल्चोकको जुगल गाउँपालिकाको वडा नम्बर २ र ३ मा निर्माण हुने ५० मेगावाट बढी क्षमताका दुई जलविद्युत आयोजनामा ७ बैंक तथा वित्तिय संस्थाहरूले लगानी गर्ने भएका छन् । ३५.४७ मेगावाटको ब्रम्हायणी र १५.१५ मेगावाटको माथिल्लाे ब्रम्हायणी जलविद्युत आयोजनाका उक्त बैंक तथा वित्तिय संस्थाले ऋण लगानी गर्ने भएका हुन् ।
इन्टिग्रेटेड हाइड्रो फण्ड नेपाल प्रालिले निर्माण गर्ने दुवै आयोजनामा सानिमा, सिद्धार्थ, कुमारी, लक्ष्मी, प्रभु बैंक, हाडड्रो इलेक्ट्रिसिटी इन्भेष्टमेन्ट एण्ड डेभेलपमेन्ट कम्पनी (एचआइडीसीएल) र मञ्जुश्री फाइनान्सले ऋण लगानी गर्ने भएका छन् । ति बैंक तथा वित्तीय संस्था र इन्टिग्रेटेड हाइड्रो फण्ड नेपालबीच लगानी सम्झौतासम्बन्धि सहमतिपत्रमा हस्ताक्षर भएको छ ।
सम्झौतापत्रमा कम्पनीका तर्फबाट अध्यक्ष भरतप्रसाद पराजुली र बैंक तथा वित्तीय संस्थाका तर्फबाट ऋण लगानीमा अगुवाई गर्ने सानिमा बैंकका प्रमुख कार्यकारी अधिकृत निश्चलराज पाण्डेले हस्ताक्षर गरे ।
सम्झौताअनुसार ब्रम्हायणी आयोजनामा सानिमाले २४.७८, सिद्धार्थले १८.५८, कुमारीले १५.०४, लक्ष्मीले १४.१६, प्रभुले १०.६२ र मञ्जुश्री फाइनान्सले ३.५४ प्रतिशत ऋण लगानी गर्नेछन् । यो आयोजनामा हाडड्रो इलेक्ट्रिसिटी इन्भेष्टमेन्ट एण्ड डेभेलपमेन्ट कम्पनी (एचआइडीसीएल) ले ८.८५ प्रतिशत लगानी गर्नेछ ।
त्यस्तै, अप्पर ब्रम्हायणी आयोजनामा सानिमाले २४.७०, सिद्धार्थले २९.२९, कुमारीले १२.५५, लक्ष्मीले १२.५५ प्रभुले ८.३७ र मञ्जुश्री फाइनान्सले १.१८ प्रतिशत ऋण लगानी गर्नेछन् ।
ब्रम्हायणीका लागि ७ अर्ब ३४ करोड १ लाख १६ हजार रुपैयाँ र अपर ब्रम्हायणीका लागि ३ अर्ब १२ करोड ४१ लाख ६२ हजार रुपैयाँ लगानी अनुमान गरिएको छ । दुबै आयोजनामा बैंक तथा वित्तीय संस्थाले ७५ र प्रतिशत सेयरधनी प्रवर्द्धकले २५ प्रतिशत लगानी हुनेछ ।
हाल आयोजनास्थल पुग्ने पहुँचमार्ग निर्माणको काम भइरहेको छ । आयोजनाको सबै काम पूरा गरेर २०८२ कात्तिकभित्र विद्युत उत्पादन गर्नेे लक्ष्य राखिएको पराजुलीले बताए । दुबै आयोजनाबाट उत्पादित विद्युत जुगल गाउँपालिकामा निर्माणाधीन पाङताङ सबस्टेसनमा जोडिनेछ ।
आयोजनाको निर्माण पूरा भएपछि जुगल गाउँपालिकाका अति विकट क्षेत्रको रुपमा परिचित तेम्बाथान, तेगा, दीपु र साङलिङलगायत ठाउँका स्थानीयको जीवनस्तरमा सुधार हुने उनको भनाई छ ।
