ऊर्जा खबर
काडमाडौं । गोरखा जिल्लाको अजिरकोट गाउँपालिकामा निर्माण हुने ८.८३६ मेगावाटको दूधपोखरी चेपे जलविद्युत आयोजनामा राष्ट्रिय वाणिज्य बैंकले ऋण लगानी गर्ने भएको छ । बैंकले १ अर्ब १९ करोड रुपैयाँ लगानी गर्ने भएको हो ।
प्रवर्द्धक दूधपोखरी चेपे हाइड्रो पावर कम्पनी र बैंकबीच बिहीबार (माघ १९ गते) लगानी सम्बन्धि सम्झौतामा हस्ताक्षर भएको छ । सम्झौतामा कम्पनीका अध्यक्ष सविन प्रधानाङ्ग र बैंकका प्रमुख कार्यकारी अधिकृत किरण कुमार श्रेष्ठले हस्ताक्षर गरे ।
सम्झौता अनुसार यो १ अर्ब १९ करोड रुपैयाँ कुल लागतको ७० प्रतिशत हो । बाँकी ३० प्रतिशत स्वपूँजी लगानी रहने कम्पनीले जनाएको छ ।
आयोजनामा १७५५ मिटर लामो हेडरेस सुरुङ र ३११९ मिटर लामो पेनस्टक निर्माण हुनेछ । यो आयोजना पूरा भएपछि वार्षिक ५६.१९ गिगावाट घन्टा विद्युत उत्पादन हुनेछ । हिउँमा १९.२८ गिगावाट घन्टा र बर्खामा ३६.९१ गिगावाट घन्टा विद्युत उत्पादन हुने कम्पनीले जनाएको छ ।
आयोजनाबाट उत्पादन भएको विद्युत ३३ केभी प्रसारण लाइनमार्फत २८ किलोमिटर दुरीमा रहेको नेपाल विद्युत प्राधिकरणको लमजुङमा रहेको कीर्तिपुर सबस्टेसनमा जोडिनेछ । आयोजना निर्माण सुरु भएको साढे २ वर्षमा सम्पन्न हुनेछ ।
कम्पनीले आयोजनाको अध्ययन पूरा गरी २०७७ माघ १९ गते नै विद्युत विकास विभागबाट आवेदन पाएको हो । आयोजनाको विद्युत खरिद सम्झौता (पीपीए) सम्पन्न भइसकेको छ ।
