ऊर्जा खबर
.jpg)
काठमाडौं । सिन्धुपाल्चोकमा निर्माणाधीन ३६ मेगावाटको माथिल्लो बलेफी ‘ए’ जलविद्युत आयोजनाबाट अबको १ महिनामा विद्युत उत्पादन सुरु हुने भएको छ । निर्माण अन्तिम चरणमा पुगेको आयोजनाबाट दशैंअघि नै विद्युत उत्पादन सुरु गर्ने तयारी भइरहेको हो ।
आयोजनाबाट गत जेठदेखि विद्युत उत्पादन सुरु गर्ने तालिका भए पनि कोरोना (कोभिड–१९) महामारीको दोस्रो लहरका कारण निर्माण सामाग्री ढुवानी तथा कामदार अभावले उत्पादन धकेलिन पुगेको हो । आयोजनामा कार्यरत कर्मचारी तथा कामदार नै कोरोना संक्रमित भएकाले पनि निर्माण प्रभावित हुन पुगेको थियो ।
आयोजनाको संरचना निर्माणको सबै काम सम्पन्न भइसहेको प्रवर्द्धक बलेफी हाइड्रो पावर कम्पनीका सञ्चालक उमेश कसजुले बताए । ‘आयोजनाको संरचना बनाउने काम सकिएको छ,’ उनले ऊर्जा खबरसँग भने, ‘अहिले अन्तिम चरणको फिनिसिङको काम चलिरहेको छ । विद्युतगृह नजिकै स्वीचयार्ड बनाउने काम पनि सकिन लागेको छ ।’
उनले बढीमा १ महिनामा आयोजनाबाट परीक्षण उत्पादन सुरु गर्न सकिने बताए ।दशैंअघि नै आयोजनाबाट परीक्षण उत्पादन सुरु गर्नका लागि नेपाल विद्युत प्राधिकरणलाई प्राविधिक टोली तयार गर्न भनी पत्राचारसमेत गरिसकेको पनि उनले बताए । १५ दिनको परीक्षण उत्पादनपछि आयोजनाले व्यापारिक उत्पादन सुरु गर्नेछ ।
आयोजनाबाट उत्पादन हुने विद्युत २२ किलोमिटर दुरीमा रहेको लामोसाँघु सबस्टेसनमा जोडिनेछ । आयोजनाको विद्युतगृहमा १२ मेगावाटका ३ वटा उत्पादन युनिट छन् ।
लामोसाँघुसम्मको प्रसारण लाइन आयोजनाको प्रवर्द्धक कम्पनीले निर्माण छ । आयोजना सम्पन्न गर्न ७ अर्ब रुपैयाँ खर्च हुने अनुमान छ । ३० प्रतिशत स्वपुँजी र ७० प्रतिशत ऋण लगानी रहेको आयोजनामा ५ बैंकले ऋण दिएका छन् ।
