ऊर्जा खबर
काठमाडौं । अरुण काबेली पावर कम्पनीले एक वर्षमा करिब २९ कराेड रुपैयाँ मुनाफा कमाएकाे छ । कम्पनीले गत आर्थिक वर्ष (२०७७/७८) यति खुद मुनाफा कमाएकाे हाे ।
पाँचथरमा सञ्चालित २५ मेगावाटकाे काबेली बी–१ जलविद्युत केन्द्रले उत्पादन गर्ने विद्युत बिक्री तथा अन्य स्राेतबाट २८ करोड ९७ लाख ९१ हजार रुपैयाँ खुद नाफा आर्जन भएकाे कम्पनीले जनाएकाे छ । विद्युत उत्पादन आम्दानी बढेसँगै अघिल्लाे आर्थिक वर्षकाे तुलनामा खुद नाफा पनि बढेको कम्पनीकाे दाबी छ ।
कम्पनीका अनुसार आर्जन गरेको खुद नाफा अघिल्लो वर्षको यही समयअवधिको तुलनामा १८ करोड १८ लाख १४ हजार रुपैयाँ बढी हो । अघिल्लो वर्ष १० करोड ७९ लाख ७७ हजार रुपैयाँ खुद नाफा कमाएको थियो ।
यही अवधिमा कम्पनीले विद्युत बिक्रीबाट ७० करोड ६७ लाख ६ हजार रुपैयाँ आम्दानी गरेको छ । अघिल्लो वर्ष यही समयअवधिमा ४० करोड ७२ लाख ३ हजार रुपैयाँ आम्दानी गरेको छ । यस्तै, कम्पनीले अन्य स्रोतबाट पनि २ करोड ६ लाख २१ हजार रुपैयाँ आम्दानी गरेको छ । कम्पनीको अन्य स्रोतबाट हुने आम्दानी भने अघिल्लो वर्षकोतुलनामा घटेको हो । अघिल्लो वर्ष २ करोड २९ लाख २० लाख रुपैयाँ आम्दानी गरेको थियो ।
कम्पनीले संखुवासभामा निर्माण गरेको ३ मेगावाटको पिलुवा खोला, र २५ मेगावाटको काबेली बी ‘१’ जलविद्युत केन्द्र सञ्चालनमा छ । काबेली बी ‘१’ ले २०७६ कात्तिक २३ गतेदेखि नियमित विद्युत उत्पादन गरिरहेको छ ।
