ऊर्जा खबर
काठमाडाैं। सरकारले आगामी वर्षादेखि बिजुली बेच्नका लागि तयारी अघि बढाइरहेको बेला नेपालको बिजुली बेच्न नहुने तर्क अघि सारिएको छ ।
फ्रेन्डसिप फोरम फर नेपालीज जर्नालिष्टको काठमाडौं आयोजना गरेको ‘दक्षिण एसियाको जलस्रोत र नेपालको दृष्टि’ विषयक अन्र्तक्रिया पूर्व जलस्रोत मन्त्री दीपक ज्ञवाली, पूर्व मुख्य सचिव लीलामणि पौडेल, जलस्रोत क्षेत्रका विज्ञ रतन भण्डारीलगायतले यस्तो धर्क गरेका हुन् ।
पूर्व जलस्रोत सचिव ज्ञवालीले भारतले बिजुली बेचेर कुनै देश धनी नभएको तर्क गर्दै स्वदेशमै खपत बढाउनुपर्ने बताए । नेपालमा निजी क्षेत्रबाट उत्पादन भइरहेको विद्युत् केन्द्रीय ग्रिडमा जोड्नको लागि ट्रान्समिसन लाइन बनाउन आवश्यक भएको बताउँदै उनले स्वदेसीभन्दा विदेसीलाई प्राथमिकतामा राखेर सरकार अघि बढेको बताए ।
भारतले पञ्चेश्वर बिजुलीभन्दा पनि पानीको लागि बनाउन लागेको बताउँदै बूढीगण्डकी लगायतका ठूला आयोजना बनाउँदा नेपालको हितलाई प्राथमिकतामा राख्नुपर्ने बताए । पूर्व मुख्य सचिव पौडेले बिजुली बेचेर कुनै देश धनी नभएको तर्क गर्दै कच्चा पदार्थको रुपमा रहेको बिजुलीलाई उपयोग गर्नका लागि स्वदेशमै खपत बढाउनुपर्ने बताए ।
हालै अमेरिकाले चीनबारे लिएको नीतिमा नेपालको प्रसंग जोड्नु गलत भएको बताउँदै नेपालले अरु देशका लागि आफ्नो विगतको परम्पराबाट पछि हट्न नहुने बताए । जलस्रोतका ज्ञाता भण्डारीले भारतको स्वार्थ नेपालको पानी जसरी भएपनि लैजाने भएकोले यसमा सजग हुनुपर्ने बताए ।
स्वतन्त्र ऊर्जा उत्पादकहरुको संस्था (इप्पान) का उपाध्यक्ष गणेश कार्कीले भने जलविद्युत् विकासबाट आर्थिक समृद्धि हुने भएकाले यसका आन्तरिक खपतसँगै विद्युत् आदानप्रदानलाई महत्व दिनुपर्ने बताए । ऊर्जा तथा जलस्रोत मन्त्रालयका सचिव मधुसुदन अधिकारीले पहिलोपटक एकीकृत जलस्रोत ऐन पारित भएकाले अब जलस्रोत क्षेत्रको समग्र विकास व्यवस्थित रुपमा हुने बताए ।
काराेबार दैनिक
